Driver natagpuang patay sa Malabon

PALAISIPAN pa rin sa pulisya ang pagkamatay ng 54-anyos lalaki na natagpuang wala nang buhay at nakadapa sa tinutuluyang bahay sa Malabon City, kahapon ng madaling araw.

Huling nakitang buhay si Roy Marco, driver ng isang malaking medical laboratory ng kanyang kasamahan sa trabaho na si Teofilo Casipong, 56 anyos, dakong 11:00 pm nitong Lunes, na nakahiga sa kama sa loob ng tinutuluyan nilang bahay sa Gov. Pasucal St., Brgy. Potrero.

Gayonman, dakong 3:00 am kahapon, nakita na lamang ni Casipong ang biktima na nakadapa sa sahig at napansin niyang hindi na humihinga kaya’t kaagad siyang humingi ng tulong at ipinagbigay-alam sa mga tauhan ng Malabon Police Sub-Station 1 ang pangyayari.

Sa pahayag ni Casipong sa pulisya, wala naman siyang napupunang karamdaman ang biktima at naging ugali nitong gumising nang maaga upang patukain muna ang mga alagang manok bago pumasok sa kanilang pinaglilingkurang kompanya.

Iniutos ni Malabon police chief P/Col. Albert Barot na isailalim sa autopsy examination ang bangkay ni Marco upang alamin kung ano ang naging sanhi ng maaga nitong kamatayan. (ROMMEL SALES)