Kelot itinumba ng rider sa QC

PATAY agadang isang lalaking malapitang binaril nang dalawang beses sa ulo ng hindi kilalang rider sa isang tindahan sa Barangay Batasan Hills, Quezon City, nitong Miyerkoles ng gabi.

Ang biktima ay kinilalang si Walde Jorlano Florencio, nasa hustong gulang, tubong Infanta, Quezon at pansamantalang naninirahan sa isang barung-barong sa sidewalk ng Palengke sa Batasan, Commonwealth Avenue, Barangay Batasan Hills, QC.

Sa report ng Criminal Investigation and Detection Unit ng Quezon City Police District (CIDU-QCPD), bandang 6:00 pm nitong Huwebes, 13 Oktubre, nang maganap ang insidente sa loob ng Sandigan Batil Patong Store, na matatagpuan sa KM 18, Palengke ng Batasan, Commonwealth Avenue, Barangay Batasan Hills.

Batay sa imbestigasyon ni P/Cpl. Nido Gevero, Jr., nakita umano ng cashier na pumasok ang biktima sa  Sandigan Batil Patong Store, kasunod ang isang lalaking armado ng baril, naka-half-face helmet, nakasuot ng t-shirt, brown pants, at facemask.

Nagulat ang kahera nang malapitang binaril nang dalawang beses sa ulo ang biktima ng suspek na mabilis na lumabas ng tindahan, sumakay sa motorsiklo at tumakas.

Nasamsam sa crime scene ng SOCO team sa pamumuno ni  P/Lt. Reynold Tabbada, ang dalawang basyo ng hindi pa batid na kalibre ng baril.

Inaalam ng mga awtoridad ang motibo sa nangyaring pamamaslang upang makilala ang salarin. (ALMAR DANGUILAN)