HATAW! D'yaryo ng Bayan hatawtabloid.com
PATAY ang isang rider matapos dumulas at sumemplang ang minamanehong motorsiklo saka sumalpok sa isang palikong kotse sa Caloocan City, kamakalawa ng gabi.
Dead on arrival sa Caloocan City Medical Center (CCMC) ang biktimang kinilalang si Juanito Angala, 44 anyos, may asawa, residente sa Blumentrit Extension, Sampaloc Maynila sanhi ng pinsala sa ulo at katawan.
Kusang loob na sumuko at nahaharap sa kasong reckless imprudence resulting in homicide with damage to property ang driver ng Toyota Vios na kinilalang si Francisco Manuel, 53 anyos, taxi driver at residente sa San Basilio, Santa Rita, Pampanga.
Batay sa ulat ng pulisya, ang insidente ay naganap dakong 8:40 pm nitong Linggo sa Rizal Ave., Extention corner 3rd Avenue, Brgy. 45 ng nasabing lungsod.
Binabagtas ng biktima ang naturang lugar patungong Maynila lulan ng kanyang minamanehong motorsiklo ngunit pagsapit sa kanto ng 3rd Avenue ay dumulas sa kalsada.
Sumemplang ang biktima bago sumalpok sa kanang bahagi ng papalikong kotse na naging dahilan ng matinding pinsala sa iba’t ibang bahagi ng katawan kaya’t agad siyang isinugod sa naturang ospital ngunit hindi rin umabot nang buhay. (ROMMEL SALES)
