Mike dumedma sa mga kaibigan para sa mga anak at asawa

Rated R
ni Rommel Gonzales

DALAWA na ang mga anak ni Mike Tan, sina Victoria o Tori, 2, at Priscilla o Prisci, 1. Sino si Mike Tan as a father?

“Very caring, laging iniisip ‘yung mga anak niya.

“Medyo ang hirap sagutin ng tanong mo, ha? kasi hindi ko siya iniisip bilang tatay eh. Ang sa akin lang ay mabigyan ko sila lagi ng oras, hindi ako… kung mayroon akong kayang i-sacrifice na ibang bagay, isa-sacrifice ko ‘yun para sa kanila, para sa oras na makipaglaro sa kanila, mailakad sila, lumabas kasama sila, makipagtawanan sa kanila, isasakripisyo ko ‘yun.

“Lalo na kung nakikita ko na hindi naman makatutulong sa akin bilang tatay, ibibigay ko na lang din sa kanila.”

Mas maingat si Mike dahil pandemic at todo-ingat siya para sa kanyang two girls.

“Yeah! Marami ngang nagyayaya sa aking lumabas, sabi ko, ‘Pasensiya na hindi talaga ako makakasama.’

“Ang hirap i-risk kahit sabihing naka-mask ako, naka-face shield ako, mayroon pa ring porsiyento na puwedeng madala ko ‘yung virus papasok ng bahay, eh. 

“Minsan nga… to be honest, minsan hindi ako makatulog sa gabi kasi naiisip ko paano kung magkasakit ‘yung anak ko, paano kung ganito ‘yung mangyari sa kanila, ganito ‘yung mangyari sa asawa ko.

“Nagigising talaga ako sa gabi, and hindi ko alam kung nag-o-overthink ako pero alam mo ‘yun, pagpikit ng mata mo ganoon ‘yung naiisip mo, magigising ka na lang tapos hindi ka na makakatulog. Mahirap.”

Umeere na ngayon sa GMA Afternoon Prime ang Nagbabagang Luha na gumaganap si Mike bilang si Bien.