Iniwan ng misis, driver nagbigti (Problema sa pera at pamilya)

WINAKASAN ng isang 42-anyos driver ang sariling buhay sa pamamagitan ng pagbibigti dahil sa depresyon dala ng problema sa pera at pag-alis ng asawang nag-abroad, sa Malabon City, kahapon ng umaga.

Kinilala ang biktima na si Nonito Fonelas, stay-in sa Bendel Construction Supply, matatagpuan sa Don Basillio Bautista Boulevard, Brgy. Dampalit.

Batay sa ulat ni P/SSgt. Jeric Tindugan kay Malabon chief of police (CO) Col. Albert Barot, dakong 8:00 am nang makita ng kanyang pamangkin na si Bartolome Em, 28, helper, ang biktima na nakabigti gamit ang nylon rope sa loob ng kanilang tinutuluyan sa kanilag bahay.

Ipinaalam ng saksi ang insidente sa pulisya at lumabas sa imbestigasyon na dumaranas ang biktima ng depresyon dahil sa problema sa pamilya at pera.

Ayon kay P/Major Patrick Alvarado, hepe ng Malabon Sub-Station 7, nag-abroad ang asawa ng biktima ngunit hindi na ito umuwi dahil sumama umano sa ibang lalaki.        

Lumagda at nag-execute ng waiver ang kaanak ng biktima na hindi na sila interesado sa anumang gagawing imbestigasyon ng pulisya dahil naniniwala silang nagpakamatay at walang naganap na foul play sa insidente. (ROMMEL SALES)