Pokwang bet na bet ang pagiging konteserang nanay

Rated R
ni Rommel Gonzales

SA kauna-unahang pagkakataon, mapapanood ang bagong Kapuso na si Pokwang sa real-life drama anthology na Magpakailanman sa Sabado, July 10.

Bibida si Pokwang sa episode ng #MPK na pinamagatang Nanay Kontesera. Kuwento ito ni Helen, isang inang maabilidad na gagawin ang lahat—mula sa pagtitinda, pangungutang, at pati na pagsali ng mga beauty contest—para lang itaguyod ang kanyang mga anak. Kayod-kalabaw si Helen, lalo na’t may kapansanan ang isa sa kanyang tatlong anak.

Naging tampulan ng pangungutya si Helen dahil sa paraan niya ng paghahanap-buhay para sa kanyang pamilya. Ang higit pang mas masakit, minamaliit ng kanyang sariling pamilya ang pagsali niya sa mga beauty contest.

“Talagang bet na bet ko po ‘yung role ko rito. I’m sure matatawa at maiiyak kayo. Ito po ay pinamagatang ‘Nanay Kontesera,’ ngayong Sabado na po ‘yan dito lamang po sa GMA,” share ni Pokwang.

Bahagi rin ng episode sina Boom Labrusca, Tart Carlos, Ayra Mariano, at Gold Aceron.

Huwag palampasin ang unang paglabas ni Pokwang sa brand-new episode ng #MPK, ang Nanay Kontesera, sa Sabado, July 10, 8:00 p.m. sa GMA-7.