Relasyong Jom at Abby mauwi kaya sa kasalan?

HARD TALK!
ni Pilar Mateo

“SOLID as a rock!” ang tinuran ni Abby Viduya na kikilalanin pa rin sa screen name na Priscilla Almeda sa tsikahan niya with Lolit Solis, Cristy Fermin and Mr. Fu isang hapon, sa tanong tungkol sa relasyon nila ng aktor na si Jomari Yllana.

Nagulat din ang trio sa mga tinuran ni Abby, na makasasama sa cast ng  Lolong ng GMA-7 very soon!

Buong akala kasi ng marami eh married sa kanyang ex si Abby. Si Jom naman eh, malaya na rin dahil annulled na ang kasal nila ng dakilang ina ni Andre na si Aiko Melendez.

Kaya kapwa na sila malaya. Pero wala pa naman silang planong pakasal.

Ang ikinasasaya ng tatlo ay ang katotohanan sa kasabihang sa hinaba-haba ng prusisyon, sila pa rin pala sa hangganan.

Hindi na sinasagot ni Abby ang mga isyung ipinupukol ng ex-girlfriend ni Jom, na may dalawa pa itong supling.

Ang tinuran lang nito sa pag-uusisa ng tatlo ay, ”Una siyang naging akin,” na talaga namang nagpasaya sa hosts.

Madalas ng nagtutungo sa Bicol si Abby at pamilya ni Jom na may heritage house sila sa CamSur. Kung doon na mamamalagi si Anjo at pamilya nito gaya ng mga usap-usapan ay hindi pa kinompirma ni Abby.

Aliw na aliw si Abby sa blind items shared by the trio na pinapangalanan naman agad ni Manay Lolit!

Siya naman, eh hindi na kailangan pang i-blind item dahil wala naman na siyang dapat pang itago.

May constant communication siya sa mga anak niyang nasa Canada. Hindi pa nga lang makadalaw ang mga ito sa kanya dahil bukod sa pandemya ay iba nga ang batas sa nasabing bansa para makasama niya ang mga bata.

“Kung maaayos na ang takbo natin, we might visit them there. Kami na ni Jom ang dadalaw sa kanila!”

Kung ano-ano pa rin ang gustong isipin ni Manay Lolit sa sinasabing “solid as a ROCK!”