HATAW! D'yaryo ng Bayan hatawtabloid.com
ARESTADO ang isang dating job-order traffic enforcer na natanggal sa serbisyo na naaktohan ng mga pulis na nanghuhuli ng mga motorista sa Malabon City, kamakalawa ng gabi.
Ayon kay Malabon police chief P/Col. Albert Barot, si Mike Jefferson Santelics, 39 anyos, residente sa Atis Road, Brgy. Potrero ay nakasuot ng uniporme ng Public Safety and Traffic Management Office (PSTMO) nang hulihin ng mga tauhan ng Station Intelligence Section dakong 10:35 pm habang naninita ng mga naka-motorsiklong dumaraan sa P. Aquino Ave., Letre, Brgy. Tonsuya.
Sinabi ni Station Investigation and Detective Management Section (SIDMS) chief P/Maj. Ronald Carlos, dakong 10:20 pm nang humingi ng tulong sa pulisya ang traffic enforcers na sina Allan Centron at Eliseo Dizon, kapwa ng PSTMO, matapos makita ang dating kasamahang natanggal sa serbisyo pero naninita ng mga motorista sa naturang lugar.
Inatasan ni Col. Barot ang mga imbestigador na sina P/SSgt. Mardelio Osting at P/SSgt. Diego Ngippol na alamin kung may mga reklamo ng pangingikil laban kay Santelics.
Ang suspek ay iniharap sa inquest proceeding sa Malabon City Prosecutor’s Office para sa kasong paglabag sa Article 177 of Revised Penal Code o Usurpation of Authority or Official Functions. (ROMMEL SALES)
