HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
“MARIO is a good friend, kakaka-usap ko lang sa kanya kanina.” Pagtukoy ni Erich Gonzales kay Mario Maurer nang matanong ang dalaga sa kanyang virtual media conference para sa La Vida Lena ng ABS-CBN kung may komunikasyon pa rin sila.
Ayon kay Erich, hindi sila nawalan ng komunikasyon ng Thai actor bagamat noong 2012 pa sila nagkasama sa pelikulang Suddenly It’s Magic ng Star Cinema.
Open si Erich na makatrabaho muli ang sikat na Thai actor sakaling magkaroon ng pagkakataon.
Aniya, ”Mario is a good friend. Nakakatuwa lang na kahit matagal na kaming nagkatrabaho sa aming movie na ginawa sa Thailand at dito ay nandoon pa rin ang communication, ‘yung friendship hindi nawala.”
Sa kabilang banda tuloy ang paghahanap ng hustisya ni Erich mula sa mga taong nang-api sa kanya sa teleseryeng La Vida Lena na mapapanood na sa Hunyo 28 sa Kapamilya Channel, Kapamilya Online Live, A2Z, at TV5, tuwing 10:00 p.m..
Ang La Vida Lena ay ukol kay Magda (Erich), isang babaeng puro panlalait ang nakukuha sa iba dahil sa peklat na tumatakip sa kalahati ng kanyang mukha. Sa kabila nito, lumaki siyang mabuti, masipag, at mapagmahal sa mga kapamilya at kaibigan. Sa hangaring makatulong sa kapwa, makakaimbento si Lena ng isang sabong papatok sa buong bayan ng Salvacion dahil sa kakayahan nitong magpakinis ng kutis.
Ngunit imbes na yaman ang makuha niya mula sa produktong ito, sunod-sunod na kamalasan ang matitikman niya mula sa mga Narciso, ang pinakamakapangyarihang pamilya sa bayan ng Salvacion.
Makakasama sa La Vida Lena” sina Janice De Belen, Agot Isidro, Raymond Bagatsing, Sofia Andres, Christian Vasquez, Pen Medina, Ruby Ruiz, Soliman Cruz, Malou Crisologo, Josh Ivan Morales, Hasna Cabral, Danica Ontengco, at Renshi De Guzman. Idinirehe ito nina Jojo Saguin, Andoy Ranay, at Jerry Lopez-Sineneng.
