Faith nakatulong ang work-out at meditation

COOL JOE!
ni Joe Barrameda

HINDI maitago ni Faith da Silva ang excitement na maipalabas na ang Las Hermanas.

Sa nakaraang interview, ikinuwento niya ang naging paghahanda para sa karakter na si Scarlet. ”Aside from workshops, nag-start ako mag-meditate. I kept working out. Before mag-start ‘yung lock-in taping, I was so pressured so I think nakatulong sa akin ‘yung pagwo-work-out ko because naging confident ako. In this project, ibibigay ko talaga lahat ng mayroon ako, ibibigay ko ‘yung buong puso ko.”

Dagdag pa ni Faith, nakare-relate siya sa role na ipinagkatiwala sa kanya dahil sa totoong buhay ay malakas din ang kanyang loob at determinado siyang makuha ang gusto.

Ibinahagi rin niya kung ano-ano ang mga inimpake para sa nagdaang lock-in taping. ”Ang dami kong dinala talaga! Mayroon akong blanket. Pescatarian ako, ang pinakamarami ko sigurong nadala is pagkain, healthy na snacks, Okra chips ko, lahat ng mga healthy na puwede kong dalhin na hindi masisira agad, dinala ko na.”

Makakasama ni Faith sa Las Hermanas sina Albert Martinez, Yasmien Kurdi, Thea Tolentino, Jason Abalos, Jennica Garcia at marami pang iba.