HATAW! D'yaryo ng Bayan hatawtabloid.com
NABITAG ng mga tauhan ng Philippine Drug Enforcement Agency (PDEA) ang dalawang Chinese national at nakompiskahan ng mahigit P1.054 bilyong halaga ng hinihinalang shabu sa magkahiwalay na anti-drug operations na ikinasa sa Cavite at Parañaque City, nitong Linggo ng hapon.
Ayon kay PDEA Director General Wilkins Villanueva, ang isa sa mga suspek na si Man Kuok Wong, alyas Jose Baluyot Wong, 39 anyos, ay naaresto sa isang buy bust operation dakong 4:00 pm sa Villan Nicacia, Tanza Numa 6, Aguinaldo Highway, Imus, Cavite.
Nakompiska mula kay Wong ang tinatayang aabot sa 117 kilo ng hinihinalang shabu na nagkakahalaga ng P795.6 milyon na nakatago sa tea bags.
Nakuha rin mula sa suspek ang marked money, cellular phone, Toyota Corolla, may plakang TPF-197; Mazda CX-5, may plakang NCU-5075 at Nissan GTR na may conduction sticker na F2P-235.
Samantala, ang suspek na si Zhizun Chen, 38 anyos, ay naaresto ng joint team ng mga pulis at PDEA sa parking lot ng isang supermarket sa Brgy. Baclaran, Parañaque City dakong 3:00 pm.
Nakuha ng mga awtoridad mula sa suspek ang 38 kilo ng hinihinalang shabu na nagkakahalaga ng P251 milyon, nakatago rin sa tea bags; isang mobile phone, maroon na Mitsubishi Lancer, may plakang WFG-362, at silver Chrysler, may plakang WIV-952.
Ayon kay National Capital Regional Police Office (NCRPO) chief, P/MGen. Vicente Danao, ang suspek at ang mga ebidensiyang nakuha ay nasa kustodiya na ng PDEA para sa kaukulang disposisyon.
Ang mga suspek ay nakapiit na at nakatakdang sampahan ng mga kasong paglabag sa Republic Act 9165 o The Comprehensive Dangerous Drugs Act of 2002. (ALMAR DANGUILAN)
