Lasenggong soltero, kalaboso sa molestiya (Apat na dalagita, pinaghahalikan)

HOYO ang isang 54-anyos soltero matapos gawan ng kalaswaan ang apat na kapitbahay na pawang menor de edad na dalagita sa Malabon City, kamakalawa  ng hapon.

Sa loob na ng kulungan nagpawala ng tama sa alak ang suspek na kinilalang  si Danilo Garcia, walang trabaho at residente sa Don Basilio Bautista Blvd., Brgy. Hulong Duhat nang dakpin ng mga tauhan ni P/Maj. Patrick Alvarado, hepe ng Malabon Police Sub-Station 7.

Sa tinanggap na ulat ni Malabon City Police Chief P/Col. Albert Barot, nagkukuwentohan ang magka­kaibigang dalagita sa Bantayan St., Brgy Hulong Duhat dakong 5:00 pm nang dumaan si Garcia na noo’y nasa impluwensiya ng alak at hinalikan sa pisngi ang 15-anyos at 16-anyos na dalagita.

Binalingan din ng suspek ang 14-anyos at 15-anyos na kasa­mahan ng dalawang naunang biktima at hinalikan sa labi.

Sa takot ng mga dalagita, nagtatakbo kaagad palayo sa suspek at isinumbong sa kani-kanilang mga magulang ang ginawang kalaswaan sa kanila ng lalaki.

Humingi ng tulong kay P/EMSgt. Jerry Bautista ng Malabon Police Sub-Station 7 ang mga magulang ng dalagita na nagresulta sa pagkakadakip sa suspek na nahaharap ngayon sa kasong Acts of Lasciviousness.

 (ROMMEL SALES)