Love Square tampok sa Magpakailanman

Rated R
ni Rommel Gonzales

KAPWA nasa isang magulong relasyon sina Jon at Anne. Si Jon ay mayroong kinakasama—ang mas bata at kasosyo niya sa negosyong si Kim na madalas ding pagkamalan ginagatasan niya. Si Anne naman ay nakatali sa isang tomboy—si Roxy.

Pero sa una pa lamang nilang pagkikita ay hindi na maitago ang malakas na koneksiyon at pagtingin sa isa’t isa. Sinubukang i-chat ni Jon si Anne pero hindi siya sinasagot nito. Pagkatapos lamang ng limang taon nang pagbigyan ni Anne si Jon na magkita sila.

Ngunit matutuklasan ni Jon na si Anne ay may relasyon sa isang tomboy. At nais ng mga iton na gawin siyang ‘sperm donor’ sa binabalak na pagbubuntis ni Anne sa pamamagitan ng “in-vitro”. Gulat sa nalaman, nilayuan na ni Jon si Anne.

Kung paano muling ipaglalaban nila Jon at Anne ang kanilang masalimuot na pag-iibigan ang tampok na kuwento ng Magpakailanman na pinamagatang Love Square.

Tinatampukan ito nina Dion Ignacio, Maxine Medina, Arny Ross, at Yvette Sanchez. Idinirehe ni Neal del Rosario, pananaliksik ni Karen Lustica, at panulat ni Vienuel Ello, mapapanood ito sa Sabado, 8:00 p.m. sa GMA.