HATAW! D'yaryo ng Bayan hatawtabloid.com
NAKOMPLETO na ni Navotas Mayor Toby Tiangco ang kanyang coronavirus disease 2019 (CoVid-19) inoculation kasunod ng kanyang ikalawang dose ng CoronaVac, noong Lunes sa San Jose Academy.
“Fully vaccinated na po tayo matapos makuha ang ikalawang dose ng CoronaVac. 28 days ang hinintay bago makompleto ang dalawang doses ng bakuna laban sa CoVid-19. Kailangan pong makompleto ang first at second dose para buo ang proteksiyong ating matatanggap mula sa bakuna,” ani Mayor Tiangco.
Hinimok ng alkalde ang mga Navoteño na makilahok sa programa ng pagbabakuna sa lungsod.
Binigyang diin niya ang pangangailangan na makakuha ng pangalawang dose at fully vaccinated upang matiyak ang kompletong proteksiyon mula sa sakit.
Gayonpaman, ‘di pa rin aniya 100% na hindi tayo magkakasakit ng CoVid-19 kapag bakunado na ang isang tao.
“Ang bakuna ay nagbibigay sa atin ng proteksiyon para hindi magkaroon ng severe o malalang CoVid at hindi manganganib maospital o mamatay,” anang alkalde
Ipinaalala ng alaklde, kasabay ng pagpapabakuna, patuloy pa rin isagawa ang minimum health protocols para hindi mahawaan ng sakit. (ROMMEL SALES)
