HATAW! D'yaryo ng Bayan hatawtabloid.com
PANGARAP ni KM Oliveros na makilala bilang singer/recording artist. Siya ay 13 years old, Grade 8 student sa SSS National High School, Marikina City, at tubong Palayan City, Nueva Ecija.
Sa murang edad na tatlo ay nagsimula na siyang kumanta.
Aniya, “Dream ko na po talagang maging singer kahit bata pa lang ako noon. Bale, mahilig na po akong sumali sa mga contest sa school at sa mga barangay po.”
Sa ngayon ang kanta ni KM na Ipinaglaban Kita at Sana Ako Pa Rin ay mapapakinggan sa kanyang YouTube Channel at Facebook account.
Paano niya ide-describe ang dalawang kantang ito?
Wika ni KM, “Parang naging inspirasyon ng pinsan ko po kaya naisulat niya ang Ipinaglaban Kita dahil sa mga totoong nangyayari sa kasalukuyang henerasyon. Pilit na ipinaglalaban ang pagmamahalan nila pero ang daming hadlang. Iyong Sana Ako Pa Rin naman po na ako mismo ang nag-compose, tungkol po ito sa pandemic na dahil dito’y maraming napalayo sa mga mahal sa buhay o mga kaibigan, kaya parang sinasabi na LDR.”
Ipinahayag din ni Kyla (nickname ni KM), na si Sarah Geronimo ang idol niya.
Sambit ni KM, “Si Ms. Sarah Geronimo po ang idol ko. Noong bata pa po ako, ‘yung mga kanta niya ang palagi kong kinakanta kasi, magaling siya kaya ginagaya ko po.
“Gusto ko pong maging katulad ni Ms. Sarah someday, dahil napapanood ko po kung gaano siya kasikat ngayon, hindi lang sa Filipinas kundi pati sa ibang bansa. At sa pamamagitan po ng pagkanta ay natulungan niya ang kanyang pamilya.”
ALAM MO NA!
ni Nonie Nicasio
