HATAW! D'yaryo ng Bayan hatawtabloid.com
PATAY ang isang pedicab driver matapos barilin ng dalawang hindi kilalang suspek na kanyang naging pasahero sa loob ng isang sementeryo sa Malabon city, kamakalawa ng hapon.
Agad binawian ng buhay ang biktimang kinilalang si Jesus Dela Cruz, 27 anyos, residente sa Brgy. Santolan ng nasabing lungsod sanhi ng ng bala sa ulo.
Nagsagawa ng follow-up investigation ang pulisya para sa posibleng pagkakakilanlan at pagkakaaresto sa mga suspek na mabilis na tumakas sa hindi matukoy na direksiyon.
Batay sa ulat ni P/SSgt. Jose Romeo Germinal kay Malabon City Police chief Col. Joel Villanueva, dakong 3:50 pm nang maganap ang insidente sa loob ng Tugatog Public Cemetery, Brgy. Tugatog.
Lumabas sa imbestigasyon, sakay ng biktima sa kanyang minamanehong pedicab ang mga suspek at pagsapit sa lugar ay biglang naglabas ng baril ang mga ‘pasahero’ saka pinagbabaril sa ulo si Dela Cruz bago mabilis na nagsitakas.
Nakuha ng nagrespondeng mga tauhan ng Scene of the Crime Operatives (SOCO) sa pinangyarihan ng insidente ang dalawang basyo ng bala mula sa hindi mabatid na kalibre ng baril at isang deformed fired bullet. (ROMMEL SALES)
