HATAW! D'yaryo ng Bayan hatawtabloid.com
PATAY ang isang tulak ng shabu makaraang makipagbarilan sa mga pulis na nagsagawa ng buy bust operation sa Malabon City, kamakalawa ng hapon.
Nalagutan agad ng hiningan ang suspek na kinilalang si Arnel Rabot, 23 anyos, residente sa Brgy. Potrero ng nasabing lungsod sanhi ng mga tama ng bala sa iba’t ibang bahagi ng katawan.
Batay sa ulat ni Malabon City Police Chief Col. Joel Villanueva, dakong 3:00 pm nang magsagawa ang mga operatiba ng Station Drug Enforcement Unit (SDEU) sa pangunguna ni /PLt. Joseph Alcaraz ng buy bust operation laban sa suspek sa kanyang bahay sa nasabing lugar.
Nagawang makapagtransaksiyon ni P/SSgt. Sembrero na nagpanggap na poseur-buyer sa suspek ngunit nakatunog ang pulis na Rabot, kanyang katransaksiyon.
Kaagad bumunot ng baril ang suspek at pinaputukan ang poseur-buyer na naging dahilan upang mapilitang gumanti ng putok ang back-up na operatiba na si P/Cpl. Cabrera III, nagresulta sa kamatayan ni Rabot.
Narekober ng nagrespondeng mga tauhan ng Scene of the Crime Operatives (SOCO) sa crime scene ang isang cal. 38 revolver, kargado ng tatlong bala at isang missed fire, dalawang fired cartridges, dalawang bala, limang plastic sachets ng hinihinalang shabu at ilang drug paraphernalia.
(ROMMEL SALES)
