HATAW! D'yaryo ng Bayan hatawtabloid.com
MALALALIM na sugat at halos mabiyak ang katawan ng isang sales lady nang pagsasaksakin ng isang holdaper makaraang pumalag sa panghoholdap ng suspek sa Malabon City, kamakalawa ng hapon.
Wala nag buhay nang idating sa Ospital ng Malabon (OsMa) ang biktimang kinilalang si Maribeth Camilo-Goco, 47 anyos, residente sa Gen. Luna St., Brgy. Baritan, sanhi ng mga saksak sa iba’t ibang bahagi ng katawan.
Nakapiit ngayon at nahaharap sa kasong robbery with murder ang suspek na kinilalang si Leo Ifsor, 29 anyos, residente sa Magat Salamat St., Brgy. Daang Hari, Navotas City.
Sa pinagsamang ulat nina P/SSgt. Jeric Tindugan at P/SSgt. Jose Romeo Germinal kay Malabon City Police Chief Col. Joel Villanueva, dakong 1:00 pm nang pumasok ang suspek sa Meliza’s Lingerie and Accessories Boutique sa Unit 2, 352 Gen. Luna St., sa Brgy. Baritan, kung saan nagtatrabaho ang biktima bilang sales lady.
Agad nagdeklara ng holdap ang suspek habang armado ng patalim ngunit pumalag ang biktima, na inundayan ng mga saksak sa iba’t ibang bagahi ng katawan ng holdaper bago mabilis na tumakas.
Ngunit nang dumaan sa isang dead-end na eskinita, binugbog ng mga istambay sa lugar bago napasakamay at naaresto ang suspek ng mga tauhan ng Sub-Station 7 na sina P/SSgt. Anecito Liamado, Jr., P/Cpl. Zaldy Fabul at P/Cpl. Ryan Ulat na nagpapatrolya sa nasabing lugur.
Nakuha sa suspek ang isang kitchen knife na ginamit sa pananaksak sa biktima at ang tinangay na P200 habang isinugod ang biktima sa pagamutan ngunit hindi na umabot nang buhay.
(ROMMEL SALES)
