HATAW! D'yaryo ng Bayan hatawtabloid.com
MARAMI ang nanghihinayang sa halos 12-buwang sakripisyo ng maraming mamamayang Filipino na halos naghilahod sa hirap para makaraos sa panahon ng ‘lockdown’ — ang solusyon ng pamahalaang Duterte sa paglaban sa CoVid-19 na nanalasa sa buong mundo.
Hanggang ngayon, hindi pa rin nakararaos ang mga mamamayan o pami-pamilyang nawalan ng trabaho.
Nanghinayang dahil hindi pa man sumasapit ang ika-12 buwan, e bigla na namang sumirit ang bilang ng mga infected ng coronavirus o CoVid-19 — ang nagpadapa sa ekonomiya ng buong mundo.
Lalo ng mga bansang hindi wastong natugunan ang pagharap sa isang uri ng virus na kung tutuusin ay hindi pa nakautas ng kalahati man lang sa casualties ng Spanish flu noong 1918.
Ang Spanish flu, kilala rin bilang 1918 influenza pandemic, ay umatake mula Pebrero 1918 hanggang Abril 1920. Umabot sa 500 milyones ang tinamaan ng Spanish flu at tinatayang 70 hanggang 100 milyones ang namatay — ito ang sinasabing deadliest pandemic sa human history.
Kumbaga, sisiw ang bilang ng mga biktima ng CoVid-19 — na sinasabi ngayong ‘deadly.’
Pero sa Pasay, ang sinisisi ng mga mamamayan sa pagsirit ng bilang ng mga nahawaan ng CoVid-19 ay dahil sa pagpayag ng lokal na pamahalaan na mag-operate ang mga KTV resto/bars kahit hindi pa klaro ang pandemya.
Naniniwala ang mga residente sa lungsod, na isa sa source nito ang Club Matrix, isang club sa Macapagal Ave., na dinarayo ng Chinese nationals, karamihan ay galing sa mainland China.
Kung hindi tayo nagkakamali, ang club ay eksklusibo para sa Chinese nationals.
At siyempre sa loob ng club, paano nakasisiguro na naipatutupad ang physical/social distancing. Hindi naman pupunta ang mga parokyanong Chinese para makipagtitigan lang sa mga bebot na guest relations officers (GRO).
Ang daming violations niyan. Lahat ng health protocols ay maliwanag na nilabag. At hindi na tayo magtataka kung ‘yung empleyado o GRO sa nasabing club ay makapag-uwi ng virus sa kanilang mga tahanan sa Pasay City.
Hindi lang Club Matrix, nariyan din ang Titan Z sa Macapagal Ave., sa Pasay pa rin, at ang dating Miss Universe na ngayon ay kilala bilang Universe Entertainment and KTV Bar/Campus sa F.B. Harrison sa Pasay City rin.
Wattafak!
Kung pag-aaralan ang ganyang sitwasyon ng Pasay City, hindi katakang-takang tumaas ang bilang ng mga CoVid-19 infected sa lungsod?!
E bakit ba parang giveaway na lang kung mahawa ng CoVid-19 sa Pasay City?!
Kapag tinitingnan natin si Pasay City Emi Calixto-Rubiano ‘e napakalinis naman niyang tingnan…malinis sa katawan.
E bakit naman tila nagiging ‘burara’ si Mayora sa kalusugan ng kanyang mamamayan?!
Anyare Mayora Emi?!
DOBLE-INGAT
LABAN SA COVID
IBAYONG pag-iingat ang masidhing panawagan ni Bureau of Immigration (BI) Commissioner Jaime Morente sa lahat ng empleyado ng ahensiya bunsod ng tumataas na bilang ng kaso ng CoVid-19 sa bansa.
Ang naturang kautusan ay binigyang diin lalo sa mga mababang empleyado upang ipagpatuloy nila ang mahigpit na pagsunod sa tamang paraan at makaiwas sa nakababahalang paglago ng bilang ng tinatamaan ng coronavirus.
Isang memorandum din ang ipinalabas ni Morente na nagbibigay direktiba sa lahat ng kanyang nasasakupan, lalo sa mga nagsisilbing frontliners sa airports at mga sangay ng ahensiya, na huwag kalilimutan ang tamang paggamit ng mask at ng face shields habang sila ay nasa duty.
Sinabi rin niya na ang sinomang lalabag sa nasabing direktiba ay posibleng sampahan ng kaso at patawan ng karampatang aksiyon o disiplina.
Bukod sa pagsusuot ng tamang protective gear, pinaalalahanan din ang lahat ng empleyado na ipagpatuloy ang ipinaiiral na social distancing at regular na paghuhugas ng mga kamay at paggamit ng alcohol.
(Excuse me po Mr. Commissioner, magagawa po ‘yan kung kompleto ang mga sanitizing supplies ng mga taga-airport.)
Ang BI General Services Section ay patuloy na magsasagawa ng disinfection sa mga sangay ng ahensiya upang maiwasan ang prehuwisyong dala ng CoVid-19.
Kailan lamang ay maraming empleyado ng BI ang nag-positive sa naturang virus. Kasama rin sa tinamaan ang ilang opisyal sa mga airport kaya naman pinagdo-doble ang kanilang pag-iingat.
Ang mga empleyado na sinamang-palad na kinapitan ng CoVid-19 ay agad pinag-quarantine at sumalang sa RT-PCR testing.
Ang BI na ikinokonsiderang isa sa pinakaabalang frontline agencies ay may mga miyembro na regular na humaharap sa mga biyaherong papasok at papalabas ng bansa.
Dahil dito ay hindi maiiwasan na sila ang unang tamaan ng sakit dahil sa close contacts nila sa mga pasahero.
Dagdag ni Commissioner Morente, ang BI CoVid-19 Task Force na pinangungunahan ni Deputy Commissioner Aldwin Alegre ay agarang nag-request ng vaccine allocation para sa kanilang frontliners.
Nitong nakaraang March 12 ay nalathala ang pinakamataas na datos ng tinamaan ng CoVid-19 sa isang araw na 4,578 katao ang iniulat na nagpositibo.
Kung patuloy na tataas nang ganito ay posibleng ibalik ng pamahalaan ang total lockdown sa ilang lugar sa bansa lalo sa Metro Manila.
Paktay kang bata ka!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
