HATAW! D'yaryo ng Bayan hatawtabloid.com
ANG ‘Dong Diskarte ng Zamboanga del Sur’ na si Liofer Pinatacan ang ibinoto ng taumbayan na Big Winner ng Pinoy Big Brother Connect sa ginanap na kauna-unahang virtual Big Night noong Lingog ng gabi, (Marso 14).
Nakakuha si Liofer ng 20.90% na pinagsamang Kumu at text votes. Pumangalawa naman si Andrea Abaya, ang ‘Cheerdance Sweetheart ng Parañaque,’ na may 16.60%, habang third at fourth Big Placers naman sina Kobie Brown, ang ‘Charming Striker ng Parañaque,’ na may 3.36%, at Jie-Ann Armero, ang ‘Kwelang Fan Girl ng Sarangani’ na umani ng 2.66%.
Emosyonal at speechless si Liofer matapos itanghal na Big Winner dahil sa dami ng pagsubok na pinagdaanan sa loob ng Bahay ni Kuya na nanatili sa loob ng mahigit tatlong buwan na hinamon silang magpakatotoo, magtiwala sa sarili, at kumonekta sa isa’t isa.
“Grabe. Gusto ko lang magpasalamat sa lahat-lahat ng sumuporta sa akin dito,” anang bagong Big Winner, na ibinahagi rin noong Big Night na ang una niyang gagawin ay tulungan ang ina sakaling manalo.
Wagi ng bagong house and lot mula sa Phirst Park Homes at P-M mula sa Brilliant Skin Essentials ang Big Winner na si Liofer. Habang may cash prizes naman na matatanggap sina Andrea Abaya, Kobie Brown, at Jie-Ann Armero na P500,000, P300,000, at P200,000.
Naroon naman upang salubungin sa outside world si Liofer ang kapwa niyang Big Winners sa iba’t ibang edisyon ng PBB, kabilang sina Nene Tamayo, Bea Saw, Ruben Gonzaga, Ejay Falcon, Slater Young, Daniel Matsunaga, Jimboy Martin, at Yamyam Gucong.
Bukod sa pag-anunsiyo ng Big Winner ng season na ito, trending din sa Twitter ang world-class performances ng BGYO, ang pagpapakilig ng KarJon at KaoRhys love teams, at ang muling pagsasama ng PBB Connect ex-housemates.
Nagpasaya rin sa viewers sina Charlie Dizon, Denize Castillo, Edward Barber, Francine Diaz, Heaven Peralejo, Jem Macatuno, Maris Racal, Michelle Vito, Nikki Valdez, Nikko Natividad, Pamu Pamorada, Ryan Bang, Tony Labrusca, Vivoree Esclito, Yves Flores, at Zeus Collins.
Samantala, marami pang dapat abangan ang fans ng PBB Connect mula sa kanilang housemates dahil inanunsiyo sa Big Night na magkakaroon ng sariling livestream ang lahat ng housemates sa Kumu upang patuloy na maghatid ng liwanag at ligaya.
Pinangunahan ng hosts na sina Toni Gonzaga, Bianca Gonzalez, Robi Domingo, Melai Cantiveros, Kim Chiu, Enchong Dee, Maymay Entrata, at Richard Juan ang unang virtual Big Night ng PBB Connect na sold out ang tickets sa KTX.ph. Mapupunta sa charity ang proceeds ng tickets. (MVN)
[/highlight]
