HATAW! D'yaryo ng Bayan hatawtabloid.com
ni ROSE NOVENARIO
MISTULANG namalengke ng kanyang mga koneksiyon sa tatlong sangay ng pamahalaan at sa media si Soliman Vilamin, Jr., a.k.a. Dexter Villamin para isulong ang mga programa ng kanyang DV Boer Farm Inc., at mahikayat ang mga Pinoy, lalo ang overseas Filipino workers (OFWs), na maglagak ng bilyon-bilyong pisong puhunan.
Sinakyan ni Villamin ang ‘Duterte mania’ sa sector ng OFWs mula noong 2016 para himukin silang maglagak ng bilyones sa kanyang investment scheme, partikular sa “Paiwi Program.”
Paliwanag ni Villamin kaugnay sa Paiwi Program, ang mga Pinoy kahit walang lupa at wala sa Filipinas ay bibili ng animals sa kanilang farm, sila na ang mag-aalaga at kapag siya ay nanganak gaya sa kambing ay bibigyan ang investor ng P3,000 sa bawat anak ng kambing.
May kalakip aniyang insurance kaya ang mga animal, kapag namatay ay papalitan ng farm, sasagutin din ng investor ang cost ng production at cost ng set-up sa mga farm kaya’t aabot hanggang P320,000 ang magagastos para sa paiwi ng kambing at may kikitaing malaki bilang return on investment (ROI) matapos ang tatlong buwan.
Sa matamis na pananalita at grandiosong paglulunsad ni Villamin ng 1st Paiwi Partners Convention at launching ng Magsasaka, Inc., noong Abril 2018 sa Lian, Batangas na ipinalabas sa Bagong Pilipinas program sa People’s Television (PTV), lalong nahikayat ang mga OFW na ipagkatiwala sa DV Boer at Subfarm ang kanilang pinaghirapang pera.
Sa nasabing pagtitipon, panauhing pandangal si Senate Committee on Agriculture Senator Cynthia Villar habang naroon din si noo’y Department of Agriculture Undersecretary for Special Concerns Ranibai Dilangalen.
“Maganda po ang kanilang adhikain at makikita natin na maganda ang ating partnership, na puwede natin silang tulungan at puwede rin nilang tulungan ang Department of Agriculture sa implementasyon ng ating mga programa at at proyekto sa Department of Agriculture,” ani Dilangalen sa panayam ng PTV sa nasabing okasyon.
“Sana po ay tuluran natin ang inisytaibo ng Magsasaka, Inc., na tinutulungan ang ating maliliit na magsasaka na i-organize , i-capacitate , at ma-empower. We really have to support our farmers para po sa ikauunlad ng ating ekonomiya at ng bansang Filipinas,” dagdag niya.
Sinubukan ng HATAW D’yaryo ng Bayan na kunin ang panig ni Villar ngunit hanggang sa isinusulat ang artikulong ito’y walang tugon ang senadora kung ano ang naging kaugnayan niya kay Villamin na nahaharap sa mga reklamo at kasong syndicated estafa dahil sa pagkabigong ibalik ang puhunan ng kanyang investors o ibigay ang ROI.
Habang hinihintay ng Hataw ang sagot ng DA kaugnay sa pag-endoso ni Dilangalen sa proyekto ni Villamn at kung ano ang maitutulong ng kagawaran sa naging biktima ng multi-bilyong pisong investment scam.
Hindi lamang matataas na opisyal ng pamahalaan ang nakakiskisang-siko ni Villamin, namayagpag din siya sa hanay ng mga unipormado.
Matutunghayan sa Facebook page ng DV Boer Farm Agricultural Resort noong 9 Hulyo 2020 ang larawan ni Villamin na nagpresenta ng aklat na may titulong Agrikultura at Kasaysayan kay noo’y Armed Forces of the Philippines (AFP) chief of Staff Gen. Filemon Santos.
Nang araw ding iyon ay nagbigay ng ‘small souvenir’ si Villamin kay AFP-Civil Relations Service chief Maj. Gen. Ernesto Torres.
Kung real-time ang naturang FB post ni Villamin, kapansin-pansin na wala silang suot na face mask o face shield nina Santos at Torres kahit ipinaiiral sa bansa ang mahigpit na health protocols para maiwasan magkahawaan ng CoVid-19.
(May Karugtong)
