‘Checkpoint’ sa Tanay may koordinasyon kaya sa IATF?

NAGULAT ang ilang riders at motorista sa isang checkpoint sa Tanay, Rizal sa bahagi ng Barangay Sampaloc.

Ito ‘yung lugar pag-ahon mula sa Morong at pagkatapos ay biglang haharangin para hingan ng medical certificate.

Nagulat ang mga motorista dahil walang announcement kaugnay ng nasabing rekesitos ng local government ng Tanay.

Ayon sa isang nasitang rider, regular nilang daanan iyon patungo sa ilang bayan sa Laguna kaya laking pagtataka nila nang bigla silang hiningan ng medical certificate sa checkpoint.

Common sense lang siguro, naka-motorsiklo ‘yung rider, kung masama ba ang pakiramdam at maysakit sila, kakayanin nilang magmotor paakyat sa Tanay?

Ang isa pang napansin ng mga rider, mayroong mga nakamotorsiklong may sakay pang bata, pero hindi sinita ng checkpoint?!

Bakit?

Mayroon bang nangyayaring hokus-pokus diyan sa Tanay checkpoint?

Ayon sa ilang tagaroon, wala naman silang alam na paghihigpit mula sa lokal na pamahalaan kaya nagtataka sila kung bakit may checkpoint?!

Paging Inter-Agency Task Force on Emerging Infectious Diseases (IATF), paki-check lang po ‘yung mga nagte-chckpoint sa Tanay kung lehitimo ‘yan. Kawawa naman po ‘yung mga walang magawa kapag hindi sila pinapayagan makalampas sa checkpoint.

Ang layo ng biyahe para bumalik sila sa pinanggalingan nila lalo na kung may hinahabol na ilang pangangailangan.

Paging IATF!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap