HATAW! D'yaryo ng Bayan hatawtabloid.com
BALIK-KULUNGAN ang isang 45-anyos ginang na nakuhaan ng ilegal na droga nang maaresto ng mga pulis habang naglalaro ng cara y cruz sa Valenzuela City, kamakalawa ng gabi.
Batay sa ulat ni P/SSgt. Carlos Irasquin, Jr., kay Valenzuela police chief Col. Fernando Ortega, dakong 6:00 pm, nagsasagawa ng Oplan Galugad ang mga tauhan ng Sub-Station 8 Ugong sa Sia Compound, Lamesa St., Brgy. Ugong nang maispatan ang isang grupo ng mga tao na naglalaro ng cara y cruz.
Mabilis na nagsitakbohan nang mapansin ang pagdating ng mga awtoridad sa magkakaibang direksiyon pero naaresto ni P/SSgt. Rodolfo Pidlaoan si Shirley Morales alyas She, residente sa Mercado St., Gen. T. De Leon.
Nakuha ng mga pulis sa lugar ang tatlong pisong barya gamit bilang pamato sa cara y cruz at P140 bet money habang nakukha sa suspek ang isang coin purse na naglalaman ng apat na plastic sachets ng hinihinalang shabu, tinatayang nasa P6,800 ang halaga, postal ID, at P100 bill.
Kasong paglabag sa RA 9165 at PD 1602 ang isinampa ng pulisya sa Valenzuela City Prosecutor’s Office laban sa suspek na aminadong dati nang nakulong dahil sa ilegal na droga.
(ROMMEL SALES)
