Gari Escobar, dream iprodyus ng pelikula ang idol na si Nora Aunor

AMINADO ang singer/songwriter/businessman na si Gari Escobar na matagal na niyang dream na maipagprodyus ng pelikula ang super idol niyang si Ms. Nora Aunor.

Lahad ni Gari, “Alam ng lahat sa 4life, since I joined in 2012 na ang pinaka-goal ko ay kumita nang malaki para mai-produce ng movie si ate Guy. Kasi ‘yun ang isang source of happiness ko, ‘yung lagi ko siyang nakikita, nababasa, napapakinggan, napapanood…

“Kahit ‘yung nakikita ko lang siya mula sa malayo, sobrang saya ko na. Kaya noong nasa US siya, ang lungkot ko noon at may naisulat nga akong songs para sa kanya, ‘yung isa ang title ay ‘Nora ko’.”

Kung sakali, gusto raw ni Gari na mapasali sa pelikulang ipoprodyus. Ano ang gusto niyang role rito?

Pahayag ni Gari, “Gusto ko ang role na akala mo antagonist sa umpisa, ‘yun pala iyon ang sasagip sa kanya, something like that po. Gusto ko siyang maging love interest sana sa movie, para kahit sa pelikula man lang ay maging ‘kami’, Hehehe.”

May bagong movie ang Superstar na ang title ay Kontrabida. Ano ang reaction niya rito?

Wika niya, “Excited po ako sa bagong movie niya… updated ako riyan kuya, hehehe. Si ate Guy naman kahit maliit na movie, ‘pag nandoon siya ay nagiging malaki, nagiging pang-global competition/exhibition. What more kung Joel Lamangan pa ang direktor, tapos si Joed Serrano pa ang producer? Parang sumanib sa kanya ang spirit ni kuya Germs, mahal na mahal niya si ate Guy.

“So definitely, this will be big. Kaabang-abang talaga ang movie ni Ate Guy na Kontrabida.”

ALAM MO NA!
ni Nonie Nicasio