HATAW! D'yaryo ng Bayan hatawtabloid.com
HINDI pa namin napapanood ang pelikulang Anak ng Macho Dancer na pinamahalaan ni Direk Joel Lamangan at pinagbidahan ni Sean de Guzman. Pero nang nakita ko pa lang ang teaser nito ay napabilib kami sa acting ni Sean na natural at may lalim.
Base naman sa mga nabasa at narinig naming feedback, marami ang pumuri sa ipinakitang husay ni Sean sa kanyang first starring role. Kaya hindi kataka-taka kung lalong magningning ang bituin ni Sean sa mundo ng showbiz.
Actually, bago pa man naipalabas ang pelikulang pinagbidahan niya, dinagsa na ng blessings si Sean. Una na ang pagpirma niya ng guaranteed 10 picture movie contract sa Viva Films at pagkakaroon niya ng endorsement, ang Blackwater.
Bukod dito, nalaman namin sa mabait na talent manager at lady boss ng 3:16 Events & Talent Management na si Ms. Len Carrillo na may nakakasa nang dalawang pelikula si Sean, na iba pa sa gagawin niya sa Viva Films. Plus, may TV series din ang actor.
Kaya ang pagpatok ng Anak ng Macho Dancer ay additional blessing para sa guwapitong member ng Clique V. Base sa pahayag ni Sean, makikita na seryoso talaga siya sa kanyang craft. “Pinagbubuti ko po talaga ang trabaho ko para hindi ako mapahiya. Pero bilang baguhan, alam ko pong napakarami ko pang mga dapat matutunan,” saad niya.
Ang Anak ng Macho Dancer na mula sa Godfather Productions ni Joed Serrano at tinatampukan din nina Allan Paule, Jaclyn Jose, Rosanna Roces, Jay Manalo, Emilio Garcia, Ricky Gumera, at iba pa, ay ipalalabas muli sa www.ktx.ph sa Feb. 5, 6 at 7 (9pm), P169 lang ang bayad dito.
Anyway, kinuha namin ang reaction ni Ms. Len sa anak-anakang si Sean sa mga kaganapan sa career nito.
“I’m so proud of him, I’m so happy at grateful sa lahat ng dumarating na blessings sa buhay ngayon ni Sean. And he really deserved it. Nagpapasalamat din ako sa lahat ng taong naniwala sa kanya at ganoon din sa mga taong pumupukol sa kanya at ‘di naniniwala sa kakayahan niya… I do believe na kapag para sa kanya, para sa kanya. Napakabait na bata ni Sean kaya alam ko na malayo ang mararating ng batang iyan,” esplika niya.
Pahayag ni Ms. Len, “I’ve seen the movie, as a newcomer okay si Sean. Can’t tell you na super-galing niya dahil ako ang manager niya. But marami pa siyang dapat matutunan pagdating sa pag-arte, marami pa siyang puwedeng ilabas. Kaya I told him na kailangan pang mag-aral kung talagang gusto niyang magtagal sa industriyang ito.
“May two movies pa siya outside Viva Films na ‘di ko pa puwedeng sabihin kung ano ito, pero nakakasa na at magsu-shoot na siya sa third week ng February, it’s a comedy film. And the other one is in March, na action naman. And may teleseryeng gagawin si Sean, mag-start mag-taping ngayong March. After that, sa Viva na, hopefully mag-start na siya to film with them,” wika pa ni Ms. Len.
ALAM MO NA!
ni Nonie Nicasio
