Estudyante sa Vale, timbog (Sa pagpatay sa 17-anyos)

NAARESTO ng mga kagawad ng Valenzuela City Police ang pang-anim na suspek sa pagpatay sa 17-anyos Grade-9 student sa naturang lungsod noong 19 Hunyo 2019.

Kinilala ang suspek na si Darryl Dela Serna, alyas Teroy, 25 anyos, naaresto ng mga operatiba ng Valenzuela City Warrant and Subpoena Section (WSS) sa pangunguna ni P/Lt. Doddie Aguirre sa Barangay Casinglot, Tagoloan Misamis Oriental.

Si Dela Serna ay inaresto sa bisa ng warrant of arrest na inilabas ng Valenzuela City Regional Trial Court, Branch 75 noong 9 Setyembre 2019 para sa kasong murder at walang inirekomendang piyansa.

Ayon kay P/Lt. Aguirre, nauna nang naaresto ang limang suspek na kinilalang sina Benjamin Diaz, Adrian Ulile John Rey Olile, pawang 18-anyos, at dalawang menor na edad 14, at, 16 anyos.

Ani P/Lt. Aguirre, kabilang ang anim sa mga suspek sa pagpatay sa biktimang si Gio Lawrence Balajadia, 17, matapos pagsasaksakin sa iba’t ibang bahagi ng katawan sa Barangay Veinte Reales noong 19 Hunyo 2019 na nag-viral pa sa social media.

Patuloy na pinaghahanap ng pulisya ang natitira pang mga suspek.

(ROMMEL SALES)