Driver itinumba ng tandem

PATAY ang isang driver matapos pagbabarilin ng isa sa dalawang hindi kilalang suspek na sakay ng isang motorsiklo habang nakikipag-inuman sa Caloocan City, kamakalawa ng gabi.

Dead on-the-spot ang biktimang kinilalang si Luisito Villarruz, 45 anyos, residente sa Block 42 Lot 5 Palmera Spring II, Celerina St., Brgy. 173, Congress, ng nasabing lungsod sanhi ng mga tama ng bala sa ulo at katawan.

Lumabas sa inisyal na imbestigasyon ng pulisya, dakong 9:30 pm, kainuman ng biktima ang saksing hindi nabanggit ang pangalan sa labas ng kanyang bahay sa Celerina St., nang dumating ang mga suspek na sakay ng isang kulay itim na Yamaha NMAX.

Bumaba ang back rider na may hawak na baril at walang sabi-sabing pinagbabaril sa katawan ang biktima na nagresulta ng kanyang kamatayan.

Matapos ang pamamaril, mabilis na tumakas ang mga suspek sa hindi matukoy na direksiyon habang humingi ng tulong ang saksi sa mga awtoridad.

Patuloy ang follow-up investigation ng pulisya sa posibleng pagkakilanlan at pagkaaresto sa mga suspek habang inaalam ang motibo sa insidente.

(ROMMEL SALES)