HATAW! D'yaryo ng Bayan hatawtabloid.com
TIMBOG ang isang tulak ng ipinagbabawal na droga matapos ang isinagawang buy bust operation ng mga awtoridad sa Malabon City, kamakalawa ng gabi.
Kinilala ang naarestong suspek na si John Efren Angel, alyas OG, 29 anyos, residente sa Kaingin II St., Brgy. Tinajeros ng nasabing lungsod na sinasabing ‘malupit’ na tulak ng shabu sa lugar.
Batay sa ulat na ipinarating ni Malabon City Police chief Col. Angela Rejano, dakong 11:50 pm nang magsagawa ng buy bust operation ang mga operatiba ng Station Drug Enforcement Unit (SDEU) sa pangununa ni P/SSgt. Julius Sembrero sa ilalim ng pamumuno ni P/Capt. John David Chua sa kahabaan ng M.H. Del Pilar kanto ng Kaingin II St., sa nasabing lugar.
Isang kagawad ng pulisya ang nagkasa ng buy bust operation at nakipagkasundo sa suspek na bibili ng halagang P500 halaga ng shabu.
Nang iabot ng suspek ang shabu sa poseur-buyer ay agad sinunggaban si Angel na hindi na nakapalag sa mga operatiba.
Nakompiska sa suspek ang 18 gramo ng shabu na tinatayang nasa P122,400 ang halaga at buy bust money.
Inihahanda ang kasong paglabag sa Comprehensive Dangerous Drug Act of 2002 laban sa suspek. (ROMMEL SALES)
