HATAW! D'yaryo ng Bayan hatawtabloid.com
DINAKIP ang tatlong tulak makaraang makompiskahan ng 3.5 kilo ng marijuana sa buy bust operation ng Quezon City Police District (QCPD) nitong Miyerkoles ng gabi sa nasabing lungsod.
Kinilala ni QCPD Director P/BGen. Danilo Macerin ang mga nadakip na sina Karl Marx Delos Santos, 22 , security guard; Dhendel Carayag, 22 anyos, kapwa nakatira sa Brgy. Gulod, Novaliches; at Joseph Vincent Santos, 22, residente sa Brgy., Sta. Lucia, Novaliches.
Base sa ulat, dakong 9:15 pm nang ikasa ng Kamuning Police Station 10 ang drug operation sa Carayag at Marianito streets, corner Quirino Highway, Brgy. Gulod, Novaliches QC.
Nauna rito, nakatanggap ng tawag mula sa concern citizen ang pulisya hinggil sa ilegal na ginagawa ng mga suspek.
Isang pulis ang bumili ng halagang P40,000 marijuana at nang magkaabutan ay dinakma ang tatlo.
Nakompiska mula sa mga naaresto ang 3.5 kilo ng pinatuyong marijuana na nagkakahalaga ng P420,000, buy bust money, dalawang cellular phone na ginagamit sa kanilang mga parokyano at Suzuki Skydrive motorcycle.
Nakapiit ang mga suspek at nahaharap sa kasong paglabag sa RA 9165 o Comprehensive Dangerous Drugs Act of 2002. (ALMAR DANGUILAN)
