HATAW! D'yaryo ng Bayan hatawtabloid.com
SWAK sa kulungan ang dalawang tulak ng shabu makaraang makuha sa kanila ang mahigit P.4 milyon halaga ng shabu nang masakote sa magkahiwalay na buy bust operation ng pulisya sa Valenzuela City, kamakalawa ng gabi.
Ayon kay Valenzuela City Police Chief Col. Fernando Ortega, dakong 8:00 pm nang magsagawa ng buy bust operation ang mga operatiba ng Station Drug Enforcement Unit (SDEU) sa pangunguna ni P/Lt. Robin Santos laban kay Joel Casuple, alyas Belok, 41 anyos, malapit sa kanyang bahay sa Purok Orosco St., Mapulang Lupa.
Nang tanggapin ni Casuple ang P2,500 marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba.
Nakompiska sa suspek ang nasa 60 gramo ng shabu na tinatayang nasa P408,000 ang halaga, buy bust money, P2,000 bills, at cellphone.
Dakong 9:30 pm nang masunggaban din ng mga operatiba ng SDEU si Jovert Bugna, 33 anyos, residente sa Candido St., matapos bentahan ng P300 halaga ng shabu ang isang pulis na nagpanggap na buyer sa buy bust operation sa Cunanan St., Mapulang Lupa.
Batay sa ulat ni P/SSgt. Carlito Nerit, Jr., may hawak ng kaso, nakuha sa suspek ang nasa tatlong gramo ng shabu na tinatayang nasa P20,400 ang halaga, marked money, cellphone at P400 bills.
Nahaharap ang mga suspek sa kasong paglabag sa Comprehensive Dangerous Drugs Act of 2002.
(ROMMEL SALES)
