HATAW! D'yaryo ng Bayan hatawtabloid.com
TODAS ang isang rider habang malubhang nasugatan ang isa pa matapos magsalpukan ang kanilang minamanehong mga motorsiklo sa Caloocan City, kamakalawa ng gabi.
Hindi na umabot ng buhay sa Bernardino General Hospital (BGH) ang biktimang kinilalang si Jet Helina, 24 anyos, residente sa B10 L10, Manga St., Amparo Subd., Brgy. 179 sa nasabing lungsod sanhi ng pinsala sa ulo at katawan.
Kasalukuyang nakaratay sa Philippine Orthopedic Hospital ang kabanggaan na kinilalang si John Michael Villanueva, 20 anyos, residente sa Bayabas St., Amparo Subd., Brgy. 179 sanhi ng mga pilay sa iba’t bahagi ng katawan.
Sa imbestigasyon ni P/Cpl. Dennis Michael Natividad, dakong 11:00 pm, nang magkabangaan ang dalawang nakamotorsiklong kapwa tinatahak ang kahabaan ng Malantik St., sa magkabilang direksiyon.
Minamaneho ni Helina ang isang Euro motorcycle samantala minamaneho din ni Villanueva ang isang Honda Click pero pagsapit sa kanto ng Ipil St., Amparo Subd., Brgy. 179, ay nagsalpukan ang harapang bahagi ng dalawang sasakyan.
Kapwa napinsala ang dalawang rider dahil sa lakas ng banggaan na nagresulta sa kamatayan ni Helina at grabeng pagkasugat ni Villanueva. (ROMMEL SALES)
