‘Taglibog’ na obrero muntik paglamayan

SUGATAN ang isang factory worker matapos pagsasaksakin ng ama ng babaeng kanyang pina­dadalhan ng malalaswa at maha­halay na pana­nalita sa pamamagitan ng messenger sa Valen­zuela City, kamakalawa ng gabi.

Muntik nang pag­lamayan ang ‘malibog na mensahero’ na kinilalang si Alexander Marcial, 40 anyos, residente sa Samonte Apartment, Barangay Bagbaguin na agad nadala sa Valen­zuela Medical Center (VMC) sanhi ng mga tama ng saksak sa iba’t ibang bahagi ng katawan.

Naaresto ng mga opisyal ng barangay ang suspek na si Rustan Chavez, 37 anyos, walang trabaho at kapitbahay ng biktima sa nasabing lugar  t nakuha rin ang ginamit na patalim.

Sa ulat kay Valenzuela police chief P/Col. Fernando Ortega, nakita umano ni Chavez ang malalaswa at maha­halay na pananalita na ipinadadala ng ‘malibog na mensahero’ sa kan­yang anak na babae sa messenger.

Upang gantihan, nagpanggap ang suspek na siya ang dalagang pinadadalhan ng mensahe at nakipag­kasundo na magkita sila sa isang lugar.

Sumangayon naman si Marcial sa pag-aakalang kausap niya ang anak hanggang nag­kasundo silang magkita sa harap ng Dela Cruz Compound sa Barangay Bagbaguin malapit sa tirahan ng pamilya Chavez.

Dakong 11:40 pm nang dumating si Marcial sa kanilang tipanan ng inaakala niyang dalagang kanyang ka-chat at pagkababa pa lamang niya ng sinasakyang motorsiklo, sinalubong kaagad siya ng suspek at inundayan ng sunod-sunod na saksak sa iba’t ibang bahagi ng katawan.

Bagama’t sugatan, nagawa pang maka­takbo ng ‘mensaherong malibog’ ngunit hinabol siya ng suspek at nang abutan ay muling pinag­sasaksak hang­gang dumating ang mga tauhan ng barangay saka inaresto si Chavez na nahaharap ngayon sa kasong frustrated murder.

(Rommel SALES)