Pagtatwa ni Duterte sa narco-list, karuwagan – HRW  

ITINATWA ni Pangulong Rodrigo Duterte ang narco-list kahit paulit-ulit niyang binabasa ito sa harap ng publiko mula noong 2016 matapos mapaslang ang isang alklade na kasama sa listahan.

Para sa Human Rights Watch, isang malaking karuwagan ang pagdistansiya ni Duterte sa ipinangalandakang narco-list.

Sa kanyang public address kamakalawa, humingi ng paumanhin si Duterte sa pamilya ni Los Baños Mayor Cesar Perez na binaril sa loob ng munisipyo kamakailan.

“That list is not mine. It is a collation. All that came from intelligence reports of drug enforcement, police and military,” sabi niya.

“I’m sorry if your father was there. But really, most of those (on the list) are into drugs. Your father might be an exception,” dagdag niya.

Isa lang si Perez sa mga alkalde na nasa narco-list na pinatay mula noong 2016.

Para kay Phil Roberston, deputy Asia director at Human Rights Watch, hindi maaaring itanggi ni Duterte ang pagkakasangkot sa karahasang sinapit ng mga nasa narco-list na ginamit ng Punong Ehekutibo bilang political propaganda sa loob ng maraming taon upang iangat ang kanyang popularidad.

“For him to disavow how these lists were used by law enforcers to violate the civil liberties and human rights of those listed is not only disingenuous – it is cowardly,” ani Robertson sa isang kalatas.

Si Perez ang ika-22 lokal na opisyal na pinatay sa mahigit apat na taong administrasyong Duterte. (ROSE NOVENARIO)