Digong sabik sa turok ng CoVid-19 vaccine

SABIK na sabik si Pangulong Rodrigo Duterte na maunang magpaturok ng bakuna kontra CoVid-19 vaccine para magsilbing halimbawa sa mga Pinoy na tangkilikin ito.

Sinabi ni Presidential Spokesman Harry Roque, ito ay kung maaaprobahan ng Food and Drug Administration (FDA) na emergency use authorization (EUA) ng bakuna.

“Definitely, as Spokesperson, I think the President is the best communication tool. So kung papayagan na po ng FDA, I think po mangunguna ang Presidente at nag-volunteer naman po siya, in fact gustong-gusto na niya,” aniya kahapon sa virtual press briefing.

Gustong ipakita aniya ni Pangulong Duterte sa buong bayan na ligtas at epektibo ang bakuna at dumaan sa experts panel group ng pinakadalubhasang Filipino at tiyak na dumaan sa highest endorsement.

Kaugnay nito, nangangamba aniya ang Palasyo na mabatikos ang administrasyon kapag naunang mabakunahan ang matataas na opisyal ng pamahalaan.

Giit ni Roque, puwedeng gamitin ng mga kritiko ang sitwasyon at sabihin na mayroong VIP treatment gaya nang naging isyu sa PCR test.

Nauna nang inihayag nina Pangulong Duterte, Senador Bong Go at Health Secretary Francisco Duque III na handa silang unang magpaturok ng bakuna.

“Alam po ninyo, personal na desisyon iyan ng ating mga namumuno ‘no pero kapag nangyari po iyan, babatuhin na naman ang gobyerno na inuuna ng bakuna ang VIPs gaya ng nangyari doon sa PCR test ‘no. So either way talagang mayroon pong mga kritiko na mambabato,” paliwanag ni Roque.

Iginagalang naman ng Palasyo kung mayroon nang ilang matataas na opisyal ng pamahalaan ang nais na magpaturok para magsilbing halimbawa na walang masamang epekto at ligtas ang bakuna.

“So kung mayroon pong ilang mga matataas na opisyal(es) na nais magpaturok para magsilbing halimbawa na wala naman pong masamang epekto sa kanila ang bakuna, we welcome that. Pero gaya ng aking sinabi po, tandaan ninyo ‘pag nangyari iyan, iyong oposisyon sasabihin na naman mayroong VIP treatment,” ani Roque. (ROSE NOVENARIO)