HATAW! D'yaryo ng Bayan hatawtabloid.com
NAGING matagumpay ang unang digital concert ng prolific singer/songwriter na si Gari Escobar na pinamagatang Gari Escobar Live! My Life! My Music! na ginanap last October 18.
Masayang kuwento niya sa amin, “Ang ganda po ng feedback ng mga nanood kuya, kapag binasa mo isa-isa, nakakatuwa.”
Pahabol pa ni Gari, “Dati kapag nagso-show ako ay nerbiyos po ang nararamdaman ko. Pero this time ay nawala na po ‘yun, masaya po ako sa buong oras ng concert kong ito. Pasasalamat po ang naramdaman ko, pasasalamat sa Diyos at sa mga tumulong po sa akin sa first digital concert ko po na ito.
“Kaya very happy po ako, kaya natabunan po ang kaba at takot. First time po na kumanta ako na hindi sumakit ang tiyan ko dahil sa stress. Dati po after ko kumanta, sobrang sakit ng tiyan ko. Pero noong concert ko po ay wala ‘yun, kaya nakadagdag ng joy ito sa akin,” masayang dagdag ni Gari.
Since idol niya si Rico J. Puno, may kinanta ba siyang song ng The Total Entertainer sa kanyang concert? Tugon niya, “Wala po, pero ‘yung kung paano siya kumanta, iyong yumuyuko… nagagawa ko po iyon. Hehehe.”
Sinasadya niya ba ang mannerism ni Rico o kusa lang itong lumalabas dahil idol niya ito? “Opo, idol ko talaga siya, pero kusa lang po itong lumalabas,” aniya.
Paano kung intrigahin siyang gaya-gaya kay Rico J? “Hahaha! Si Bruno Mars nga po inaamin niya na ginagaya niya si Michael Jackson dahil idol niya po. Si Lady Gaga inamin niya rin na noong nag-uumpisa siya ay ginagaya rin niya si Madonna dahil idol niya po.
“So, kung intrigahin po akong gaya-gaya sa idol kong si Rico J., okay lang po iyon sa akin. Sa umpisa lang naman po iyong ganyan, darating po ang time na lalabas din ang sarili kong style, sariling brand,” nakangiting saad ni Gari.
ALAM MO NA!
ni Nonie Nicasio
