Kylie, natutong umarte dahil sa mga panghuhusga

HINDI ine-expect ni Kylie Verzosa na sobra-sobra siyang magiging nbusy sa pagiging artista. Aminado rin siyang hindi naging madali para sa kanya ang pag-arte. Pero dahil na rin sa panonood sa TV at sa mga naging kasama, unti-unting nadaragdagan ang kaalaman niya sa pag-arte.

Sa Digital Media Conference ng Viva para sa kanilang Ghost Adventures 2, sinabi ni Kylie na, ”Noong una talagang nahihirapan ako kasi bago pa. ‘Yung pag-improve mo as an actress nakikita siya sa TV. Siyempre noong bago pa ako hindi pa ganoon karunong, so nakikita lahat ‘yung frustrations ko. Pero natututo kasi tayo na nakikita ng tao, so may paghuhusga rin doon.

“Pero dahil sa mga failure na ‘yun, mas naengganyo ako na gawin ang best ko. Naiinis kasi ako kapag hindi ko nagagawang mabuti ang isang eksena o hindi ko nagagawa ang isang bagay na mabuti. Kailangan gawin ko iyong mabuti.”

Kaya naman nakatulong ang quarantine kay Kylie para sanayin ang sarili sa pag-arte. Nag-workshop siya sa kanyang magaling na boyfriend na si Jake Cuenca.

“Kaya nitong quarantine, nagwo-workshop lang ako. Minsan tinatanong ko si Jake. Super helpful kasi si Jake sa career ko, so nagbabatuhan kami ng lines and I asked for his advice on how should I do this and that. Para handa na ako sa pagpunta sa set.”

Sobra-sobra rin ang pasasalamat ni Kylie na maganda ang takbo ng career niya. “Hindi ko ine-expect at sobrang nakatutuwa lang na masaya lang ako na magtrabaho. Sobrang grateful ako na nabibigyan ako ng opportunity.”

Hindi naman nahirapan si Kylie sa pagko-comedy dahil inalalayan siya ng mga kasamahan niyang sina Benjie Paras at Empoy Marquez.

“Go with the flow lang ako. Pinanonood ko sila at importante sa akin ‘yung pagsasama namin sa set dahil nga sa lock-in, mas nakapalagayang loob ko sila. Parang wala naming awkwardness sa set sobrang madali lang right away,” anang beauty queen.

Pinuri naman ni Benjie si Kylie at sinabing, “Si Kylie kasi nakikinita ko na simula pa lang, nagkausap-usap kami dahil magkakasama nga kami, siyempre masaya siguro isang oras kuwentuhan lang lahat. Kaya pagsabak namin parang very light lang, walang pressure na for Kylie. Natural siya, magaling eh, at kung ano ang sasabihing scenario sa kanya, kung ano ang dapat niyang arte, hindi mo na kailangang i-correct eh, magaling. Kasi may mata siya, ‘yun ang importante roon, nakukuha ang reaction niya.”

Sobrang na-enjoy din ni Kylie na kasama sina Benjie at Empoy. ”’Yung company nila sobrang na-enjoy ko at saka ito ‘yung unang beses ko na nag-work ako after quarantine. So, excited talaga akong magtrabaho. Tapos noong malaman ko na kasama silang tatlo, sobrang swabe, light lang ang sets, na-enjoy ko talaga ang taping.”

Kasama rin sa Ghost Adventures 2 si Andrew Muhlach. Handog ito ng Viva TV, Cignal TV, at SariSari Network na mapapanood sa TV5 sa October 31, 6:00 p.m..

SHOWBIZ KONEK
ni Maricris Valdez Nicasio