Sanya, itotodo ang lahat para kay Gabby

“YES, confirmed na. Ako po si First Yaya. Ako po si Yaya Melody,” ito ang naging pahayag ni Sanya Lopez nang ianunsiyong siya ang napili para sa title role ng First Yaya na upcoming seies ng GMA.

 

“Siyempre po kabado and excited dahil alam ko na malaki ‘yung ine-expect nila sa akin bilang inyong First Yaya.

 

“First time ko po kasi na binigyan po ako ng show sa primetime na ako po ‘yung title role kaya naman talagang maraming-maraming salamat po nang sobra-sobra sa GMA po.”

 

Itotodo ni Sanya ang preparasyon para sa kanyang bagong character, lalo na’t makakatambal din niya sa programa si Gabby Concepcion.

 

“Nasa proseso pa po ako ng pagkilala kay Yaya Melody para po mas mabigyan ko ng buhay at justice ‘yung role o ‘yung pagkatao niya.

 

“Noong umpisa po talaga noong nalaman ko na si Mr. Gabby Concepcion ‘yung makakasama ko rito, talaga sabi ko, ‘Wow, Mr. Gabby Concepcion!’ Kasi alam naman po natin na talagang gwapo at magaling na aktor si Mr. Gabby Concepcion. Kaya naman siguro sa part ko na lang, gagawin ko na lang is paghandaan ko ‘yung bawat eksena para hindi po ako mapahiya sa kanya.”

Challenge at blessing para kay Sanya ang pagkamit ng title role. At ayon pa sa Kapuso actress, hindi naman nalalayo sa kanya ang kanyang gagawing character.

 

“’Yung Bulacan po, malaking source of inspiration po dahil dati po kasi inaalagaan ko rin po ‘yung lola ko. Tapos sa Laguna naman po, may mga pinsan po akong mga baby pa. Nasubukan ko pong ako na ‘yung nagpapalit ng diaper nila, ako pa ‘yung naglilinis, ako ‘yung nag-aayos.”

 

May pangako si Sanya sa publiko, “Gagalingan ko bilang inyong First Yaya. Sana po ay mahalin ako ng mga tao, maraming makare-relate sa akin, at pasasayahin kayo ng First Yaya na ito.”

Rated R
ni Rommel Gonzales