Suweldo ni Cong. Alfred, ipinambili ng mga tablet para sa mga estudyante  

SIMULA na ng klase sa buong Kapuluan. Sa “new normal”. Sa Blended Learning.

 

Kung noon, nagkukumahog na pumila na sa bookstore ang mga magulang para bilhin na ang mga kagamitang kakailanganin ng mga anak na nag-aaral at maya’t mayang sinisipat ang listahan ng bawat gamit na bibilhin, sa panahon ngayon ng pandemya, isa ang napakahalagang kailangan magkaroon ang isang estudyante ay ang computer! Desktop. Laptop. Ito ang pinag-iipunang gadget ngayon.

 

Kaya naman, ang butihing Congressman ng ikalimang distrito ng Quezon City na si Alfred Vargas, katuwang ang kanyang kapatid na si Konsehal PM Vargas ay patuloy na namamahagi ng digital tablets sa mga estudyante sa Novaliches.

 

Ayon sa kanyang kapatid na si Konsehal PM, “Matatamis na ngiti ang sumalubong sa atin nang sorpresa nating ihatid ang libreng digital tablets sa mga magulang at estudyante bago magpasukan. Sila po ang mga sumulat at nag-PM sa ating Facebook page bago pa tayo magkaroon ng District Giveaway raffle.” 

 

Ayon naman kay Alfred, “Galing sa buong buwan nating suweldo sa Kongreso ang mga tablet na ito na sana makatulong sa pag-aaral ng mga talagang kapos ngayong pandemic. Sa mga susunod na araw, gagawa pa po tayo ng paraan upang mabigyan din ang ibang mga nangangailangan ng gadget. God bless po sa inyo.

 

“Matagal na namin itong pinaghandaan. Inunti-unti. Kaya, batch by batch siya. At kung sino ang unang nagpahayag ng pangangailangan eh, siya naming ginawang priority. Nagpapa-raffle rin kami every week. Para lang lahat ay makatanggap. Wala namang hindi kayang solusyonan kung sama-sama nating aaksiyonan. Kaya, Mayo pa lang inunti-unti ko na ang paglalaan para sa magagamit ng mga estudyante sa pagbubukas ng klase.”

 

Isa lang ito sa proyektong tinututukan ni Cong. Alfred at Konsehal PM. At hindi naman sila tumitigil sa pag-ayuda sa pangunahing mga pangangailangan ng kanilang mga nasasakupan.

 

Dagdag pa ni Cong. Alfred, magtutuloy-tuloy ang pamimigay nila ng naturang digital tablets para walang maiwanang mag-aaral, maski pa magulang.

HARD TALK!
ni Pilar Mateo