Addendum ng DPWH ‘nanganganib’ sa Senado

TATANGGALIN umano ng Senado ang mga addendum ng Department of Public Works and Highways (DPWH) sakaling hindi tugma sa lump sum projects sa ilalim ng 2021 budget.

Sinabi ni Senator Panfilo Lacson, mayroon na siyang hawak na lump sum items ng DPWH.

“Preventive maintenance, tertiary roads, secondary roads. Kung ano-ano ‘yan. Pinapatingnan ko na ngayon ang addendum, may listahan na rin kami, may nagpadala sa amin. Tatama ba roon sa mga lump sum? Kasi kung hindi nakatama roon hindi addendum ‘yan,” wika ni Lacson.

Kung ganito aniya ay ire-realign ng dalawang kapulungan ng Kongreso ang P396-bilyong lump sum sa proposed budget ng DPWH.

“‘Di nila kami maloloko roon kasi pag sinabi mong ito ang item na naka-lump sum, tutugma ba ang listahan nila? Halimbawa kung ilang libong items ‘yan, lahat ba ‘yan tatama sa nakalista sa lump sum para sabihin nilang addendum o kaya hinimay nila ang lump sum, ini-itemize?” anang senador.

“Tatanggalin namin kasi ang ilegal na ‘yan. Hindi tama yan,” dagdag niya.

Una nang pinuna ni Lacson ang P469-bilyong halaga ng reappropriated at lump sum projects ng DPWH, na tinawag nitong labag sa Saligang Batas.

(CYNTHIA MARTIN)