HATAW! D'yaryo ng Bayan hatawtabloid.com
KAHIT isa siya sa mga pinakakilala na anak ng mga artista, hindi pala alam ni Zia Dantes na sikat siya.
Ayon sa ina ni Zia na si Marian Rivera, kabaligtaran pa nga, dahil minsan pa nga, si Zia ay isang… fan!
Paborito ni Zia ang kantang Tala ni Sarah Geronimo.
“Sobrang gustong-gusto niya [Zia] ang ‘Tala,’” bulalas ni Marian.
Nagkataon naman na ang ama ni Zia na si Dingdong Dantes ay may business partner, si Ranvel Rufino na matalik na kaibigan nina Sarah at mister nitong si Matteo Guidicelli.
“Eh, itong si Dong, si Ranvel kasi, very, very close iyan kina Matteo Guidicelli at Sarah Geronimo.
“Eh, very close iyan sa amin dahil sa Dingdong.ph. Mayroon silang business ni Dong.
“So, pumupunta iyan sa bahay minsan, nagmi-meeting.
“Hanggang one time, sinend ni Dong kay Ranvel na nagta-‘Tala’ si Zia.”
Sa naturang video ay sumasayaw si Zia sa tugtog ng Tala.
“Ngayon, siguro, sinabi ni Ranvel kay Sarah. Nag-video ngayon itong Sarah.”
Nagulat at natuwa si Zia nang ipapanood dito ang video greeting sa kanya ni Sarah.
“Ang sabi ni Sarah, ‘Hi Zia, ang galing mong mag-‘Tala!’
“Kilig na kilig ang anak ko. Sabi niya, ‘Why Sarah know me? Why she knew my Tala?’”
Patuloy pang kuwento ni Marian., “Hindi siya ano—minsan si Rocco Nacino nagpupunta rito. Makikita niya sa TV. ‘Mama, that’s Rocco, right?’ Naa-amaze siya na nasa TV daw.
“So si Zia, very innocent pa rin.”
Si Rocco ay co-star ni Dingdong sa Descendants of the Sun.
Alam naman ni Zia na celebrity ang mga magulang niya, at kahit alam ni Zia na may mga nagawa siyang TV commercials, walang kaalam-alam ang bagets na celebrity din siya, bagkus nga ay napakamahiyain pa nito kapag may ibang tao.
“Oo, pero parang deadma siya. At iyon nga ang nakita namin, parang nahihiya na siya. Hindi na katulad ng dati kapag nakikita niya iyong commercial niya…
“Eh dati iyon, ‘That’s me, that’s me!’
“Ngayon, nahihiya na siya. Siguro, iyong age niya kasi, magpa-5 years old na kasi. Baka ganoon talaga ang mga bagets, nako-conscious na,” ang kuwento pa ng Primetime Queen ng GMA.
RATED R
ni Rommel Gonzales
