Sen. Bong, kasado na ang pagbabalik-TV

KASADONG-KASADO na ang pagbabalik-trabaho sa showbiz ni Senator Bong Revilla, Jr. Plantsado na ang mga detalye at susunding health protocols ng weekly program niyang Agimat kasama si Sanya Lopez.

Sa Rizal ang taping ni Sen. Bong pero mas magiging maingat siya dahil  kaka-recover lang niya sa Covid-19.

Hindi biro ang dinanas ng senador nang tamaan siya ng virus. Hirap na siyang huminga kaya nagpaospital na siya.

Ayon kay Senador Bong, hindi two hours kundi two days siyang naghintay sa emergency room bago nakakuha ng kuwarto sa St. Luke’s BGC.

“Mabuti naman at maasikaso ang nurses and doctors. Pero walang VIP treatment sa akin kahit na nga bina-bash pa ako nang magsabi ako na may Covid,” pahayag ni Sen. Bong sa virtual interview ng press.

Buong pagmamalaki naman niyang sinabi na after ng Covid, anumang pagsubok na dumating sa kanya ay kakayanin niya. Remember, mahigit four years siyang na-detain at namatay ang mahal na ama.

“Basta ako sa mga challenge, ang Diyos at pamilya ko ang kinakapitan ko. Thank God!” saad pa ng senador.

Eh sa darating sa September 25 ay kaarawan niya. No more big celebrations gaya ng nakaraang mga taon.

Sa halip, mamimigay si Senador Bong ng tablets sa nangangailangan sa buong bansa para makatulong sa pag-aaral ng mga kabataan.

Happy, happy, birthday, Senator Bong!

I-FLEX
ni Jun Nardo