Tuesday, nag-init ang ulo sa isyung tomboy

HAPPY na si Tuesday Vargas dahil nagkaroon siya ng pagkakataon para maging certified Plantita at sa pamamagitan ng kanyang Tues To Grow eh, nakapagbebenta at kumikita na siya sa mga inaalagaang halaman.

Pero, sa mundong ito nga, hindi lahat masaya na makita o mabalitaang may nilalang na gumaganda ang takbo ng buhay, lalo sa panahon ng pandemya.

Inintriga kasi si Tuesday sa kanyang pagbebenta at kung ano-ano pa ang inakusa sa kanya.

Pati nga ang pagluluto ay ginawa na rin niya. Bilang online seller, inaabala ni Tuesday ang sarili niya.

Pero ang latest na “buga” ni Tuesday sa Facebook eh, tungkol sa isang follower na ang tanong eh, ikinainit ng ulo at dugo niya.

Tinanong siya ng “tomboy ka ba?”

At ito naman ang sagot ng musikera.

“Bakit kailangan issue ‘yun?

“Kung OO ang sagot, magbabago ba ang pananaw ninyo sa akin? Kung HINDI naman ikatutuwa mo ba?

“Walang bigat ang sexual orientation ko sa kapasidad kong gumawa ng maayos na content. Yung ganitong pag iisip ay naiwan na sa lumang panahon. Kaya hanggang sa mga oras na ito ay puno ng hate at discrimination sa mga kapatid natin gawa ng mga simpleng banat na ganito na sa tunay ay napakalaki ng sinasabi.

“Ke tomboy, bakla, babae, lalaki o ‘di tiyak, lahat may puwang sa mundo. Utang na loob, huwag mo na panoorin ang channel ko kung talagang walang espasyo sa isip mo ang pagtanggap sa lahat kasi ayaw ko rin ng follower na ganyan.”

Hugot. May point naman siyang magalit. Lalo na sa mapanghusgang mga tao.

May good news din naman siya sa kabilang banda.

“I received some really wonderful news from Youtube! I have been accepted on the partner program and I am now eligible to monetize my content. At dahil dyan… May bago akong entry today:

“Click, like, share and subscribe.

“Maraming salamat sa inyong lahat na naniwala sa akin at ngayon ay nandito na tayo.”

Hanapin ang kanyang New Normal Artista (ETuesan Time) and more to  come. Na siya niyang naging content, nang sumalang na siya sa isang taping sa Cignal TV5. Ibinahagi ang buhay artista sa “new normal”.

Well-rounded personality na ngang maituturing si Tuesday. Napaka-artistic. Ang daming ginagawa. Na mahusay siya. Ipagmamalaki rin ang husay niya sa pagpipinta.

One-woman show o exhibit din ang aabangan pa sa kanya!

 

HARD TALK!
ni Pilar Mateo