HATAW! D'yaryo ng Bayan hatawtabloid.com
HINDI sapat ang pagtanggi ng Panay Electric Company (PECO) na wala silang offshore companies bagkus hinamong maglabas ng kanilang ebidensiya na magpapatunay na wala silang tagong investments sa British Virgin Islands na kilalang taguan ng illegal funds at ginagamit sa money laundering scheme.
Ayon kay Atty. Zafiro Lauron, kung walang itinatago ang PECO ay madali itong makahihingi ng sertipikasyon sa Bahamas na wala silang investments gaya ng kanilang sinasabi.
“They can always ask for certification that they don’t have any deposit or investment in the Bahamas, the thing is — why can’t they do such move” pahayag ni Lauron.
Si Lauron ang unang nagbunyag ng pagkakaroon ng tatlong offshore companies ng PECO sa Bahamas na Costa Group Investments Ltd., Prime Rose Technology, at Mega International Services na pawang nabuo noong taon 2000.
Nanindigan si Lauron na mas may basehan ang ipinalabas na report ng International Consortium of Investigative Journalists (ICIJ) na nagdedetalye ng mga binuksang offshore companies ng PECO sa Bahamas at nakalista ang mga pangalan ng mga shareholder, company address at kung kailan nai-set-up ang kompanya.
Matagal na umanong iniuugnay sa PECO ang pagkakaroon ng offshore companies ngunit lagi nila itong itinatanggi.
“Now is the proper time, ipakita nila sa mga Ilonggo kung tunay na wala silang itinatago,” giit ni Lauron.
Ipinunto ni Lauron, simomang mayamang tao ay maaaring magdeposito o mag-invest sa labas ng bansa ngunit ang nakaaalarma umano ay kilala ang British Virgin Island na taguan ng illegal funds at karamihan sa mga nagdedeposito rito ay may itinatago.
Samantala, handa umano si Lauron na harapin ang bantang kaso laban sa kanya ng PECO dahil sa kanyang naging pagbubunyag sa offshore companies.
Aniya, nagtataka siya kung bakit nais siyang patahimikin gayong maaari namang sagutin ng PECO ang kanyang akusasyon.
“Don’t shoot the messenger. They threatened me with lawsuit, its ok, Its not the first time I blew the whistle. Ginagawa ko na ito at tulong ko sa mga Ilonggo,” niya.
Una nang nagpasaklolo si Lauron sa Anti Money Laundering Council (AMLC) na imbestigahan ang nasabing offshore companies, iginiit nito na hindi simpleng usapin ang pagkakaroon ng investments ng PECO sa Bahamas dahil nakuha ito resulta ng overcharging sa loob ng maraming taon sa singil sa koryente ng distribution utility sila pa ang nangangasiwa sa supply ng koryente sa Iloilo City. (HNT)
