HATAW! D'yaryo ng Bayan hatawtabloid.com
NAGPOSITIBO sa coronavirus disease (COVID-19) ang dalawang empleyado ng Radio Television Malacanang (RTVM).
Nabatid sa source, kagabi lumabas ang resulta ng swab test ng tatlong kawani na klasipikado bilang person under investigation (PUI), at dalawa sa kanila ang nagpositibo sa COVID-19.
Ang RTVM ang naatasang ekslusibong mamahala sa broadcast ng ika-limang State of the Nation Address (SONA) ni Pangulong Rodrigo Duterte sa Lunes, 27 Hulyo 2020.
Napag-alaman, ang exposure ng dalawang taga-RTVM ay sa isang kawani ng Presidential Communications Operations Office (PCOO) sa New Executive Building (NEB) na naunang nagpositibo.
Nauna rito, apat na kawani umano ng Office of the President (OP) ang nagpositibo sa COVID-19 at hinihintay pa ang resulta ng swab test ng lahat ng nakasama nila sa shuttle bus.
Ayon sa impormante, hindi umano sumailalim sa quarantine ang nagkaroon ng “close contact” sa COVID-19 positive employees dahil babawasan ang kanilang leave credits.
Patuloy na pinapayagang mag-duty ang mga empleyado habang hinihintay ang resulta ng swab test.
Nangangamba umano ang ilang empleyado ng OP na kumalat ang sakit sa kanilang mga tanggapan lalo na’t hindi naman lahat ay nag-swab test.
Napag-alaman, lahat ng OP shuttle bus ay na-disinfect na.
Anang source, “100% ang pinapasok, mas malaki ang chance na magkahawaan kapag may asymptomatic.”
Simula noong Martes, 21 Hulyo hanggang 27 Hulyo 2020 ay suspendido ang trabaho sa PCOO sa NEB sa Malacañang Complex sa JP Laurel St., San Miguel Manila.
Sinabi ni Presidential Spokesman Harry Roque, batay sa resulta ng swab test, walang nagpositibo sa lahat ng kanyang tauhan sa Office of the Presidential Spokesperson (OPS).
“No OPS staff with COVID. We just had PCR tests. No positives. Its PCOO in NEB that had cases,” ani Roque sa text message sa media kahapon.
(ROSE NOVENARIO)
