HATAW! D'yaryo ng Bayan hatawtabloid.com
PATAY agad ang chief inquest prosecutor ng lungsod ng Maynila makaraang tambangan ng hindi kilalang grupo ng gunmen, lulan ng isang kulay itim na sport utility vehicle (SUV) sa panulukan ng Qurino Highway at Anakbayan St., Paco, Maynila.
Ayon sa ulat ng Manila Police District – Ermita Station (MPD-PS5), hindi na naisugod pa sa pagamutan ang fiscal dahil sa tama ng bala sa mukha at sa katawan ng napaslang na si Jovencio Senados y Aleman, 62 anyos, residente sa Blk. 53 Lot 19 Villa Palao, Calamba, Laguna.
Base sa imbestigasyon ng pulisya, naganap ang pamamaril dakong 11:05 am sa naturang lugar nang dikitan ng suspek ang sasakyan ng biktima.
Ayon sa ulat, nakit sa CCTV nang dumikit ang isang itim na Montero SUV may plakang ABG 8133 habang nasa unahan ng sasakyan ni Senados ang isang kulay pulang Toyota Innova na tila humarang sa sasakyan ng paslang.
Sa imbestigasyon ng Manila Police District – Homicide Section (MPD-HS), sinabi ni Feljie Bagares, pamangkin at driver ni Senados, lulan sila ng Toyota Yaris (055010) habang binabagtas ang Quirino Avenue nang biglang may humarang sa kanilang Toyota Innova na kulay pula.
Kasunod nito, sumulpot ang isang Itim na Montero SUV sa bandang kanan at kaunting binuksan ang bintana saka niratrat si Senados.
Nakita rin sa tama ng sasakyan na tila nakasentro kay Senados ang bawat putok ng baril mula sa
hindi pa tukoy na gunmen.
Mabilis na tumakas ang dalawang sasakyan patungong Taft Avenue, kung saan huling namataan ang SUV ng mga suspek sa westbound ng Quirino patungong Roxas Boulevard nang tumakas.
Dahil dito, mariing kinondena ni Justice Secretary Menardo Guevarra, ang ambush kay Senados at agad na inatasan ang National Bureau of Investigation na magsagawa ng sariling imbestigasyon tungkol sa pagpaslang sa fiscal.
“We are shocked by the audacity of this attack. it highlights once again the grave peril that our prosecutors face each day in the discharge of their duties. I have ordered the NBI to immediately step in and investigate this horrible murder,” ayon kay Guevarra.
Napag-alaman na si Senados ay matagal nang naninilbihan sa lungsod ng Maynila bilang Chief Inquest Prosecutor na ilang mga kaso ang naging kontrobersiyal dahil sa iniutos nitong “refferred for further investigation” na resolusyon sa kaso na naging dahilan ng kalayaan ng bawat naarestong akusado.
(BRIAN BILASANO)
