HATAW! D'yaryo ng Bayan hatawtabloid.com
NALULUGI ng halos P2 bilyon kada buwan ang pamahalaang lungsod ng Maynila dahil sa kinahaharap na pandemyang dulot ng coronavirus (COVID-19).
Ito ang pahayag ni Manila Mayor Francisco “Isko Moreno” Domagoso na aminadong lubhang apektado ang pamahalaang lungsod nang isailalim sa enhanced community quarantine (ECQ) ang buong kapuluan ng Luzon .
Matatandaan, sa panahon ng ECQ, suspendido ang transportasyon, walang pasok ang mga empleyado, itinigil ang trabao, at nahinto ang kalakalan sa lungsod.
“Walang nagbabayad ng mga bayarin sa City Hall dahil sarado ang mga negosyo, so, wala rin pumapasok na pera,” ayon kay Mayor Isko.
Base sa datos mula kay city treasurer Jasmin Talegon, Enero hanggang Marso bago ang quarantine, kumita ang lungsod ng P7.5 bilyon.
Dahil walang pumapasok na pondo, kailangan din gumasta ng malaking halaga ang pamahalaang lungsod upang matustusan ang ilang pangangailangan ng Manileño sa panahon ng quarantine, ayon kay Talegon.
Sinabi ni Vice Mayor Honey Lacuna, base sa listahan na ibinigay ng mga barangay chairman, ang total na bilang ng pamilya sa lungsod ay 680,000 at kapag pinarami ito ng lima o tatlong beses, ito ay nangangahulugan na may tatlong milyong populasyon ng buong Maynila.
Bukod sa pagpapamahagi ng food boxes nang ilang ulit sa lahat ng residente ng lungsod, sinabi ni Lacuna, namudmod rin ng P1K kada pamilya nang dalawang beses ang pamahalaang lungsod simula noong ECQ.
Ang nasabing cash assistance ay mula sa city amelioration crisis assistance fund o CACAF na gumastos ang lungsod ng P1.3 bilyon.
Sinabi ni Isko, sa tulong ng city council sa pangunguna ni Lacuna bilang presiding officer, nagawa ng lungsod na mai-release ang city monthly financial aid sa senior citizens, solo parents, persons with disability, estudyante ng mga city-run universities tulad ng Pamantasan ng Lungsod ng Maynila (PLM) at Universidad De Manila (UDM).
Gayondin ipinalabas na ang mid-year bonus ng 10,300 regular employees upang matulungan sila sa kasalukuyang krisis.
Nabatid sa Facebook live ni Mayor Isko, madalas itong transparent sa pamamagitan ng pagpapasalamat at binabanggit ang mga donasyon, mga indibiduwal at grupo na nagbigay tulong rin sa Maynila. (BRIAN BILASANO)
