Sam, nagpasilip sa Youtube

A day with Sam Milby Quaratine edition, ito ang titulo na mapapanood sa Youtube channel ng Cornerstone Entertainment, Inc..

Inumpisaha sa umagang paggising ng aktor at makikitang naglalagay ng gulay, ilang pirasong dalandan, saging, chia seeds, at Greenola maca powder sa blender para breakfast niya.

Habang umiinom ay nagbabasa si Sam ng Biblia, sabi niya, “quiet time.”

At may natutuhan kami, huh, kadalasan kasi kapag nagbabati kami ng itlog ay sa bowl pero si Sam, mug ang pinaglagyan ng dalawang itlog at saka hinalo ng tinidor at hayun, prinito na niya sa non-stick frying pan and yes, hindi siya gumamit ng mantika.

Nilagyan ni Sam ng cheese ang scrambled egg at isang basong gatas na may chia seeds ulit for lunch.

Pagkalipas ng ilang oras ay saka naman nag-work out ang binata ng push-ups at sabay pakita ng abs.

Ilang oras ang nakalipas ay nasa kanyang music room na si Sam, “ito ‘yung pinaka-favorite part ng condo ko, it’s my little music studio and ang daming friends na nag-recording dito.”

Naikuwento rin ng singer/actor na bata palang siya ay nanonood siya kung paano tumugtog ng piano player na pag-aari ng kanyang ama at dito siya nagsimulang matuto.

Tumugtog si Sam ng ilang classic songs at ipinakita rin niya ang mga collection niya ng gitara.

“I wanna show you my guitar collections, of course I have love for guitars and I’m very happy with the collections right now. 

“Ito ‘yung first guitar ko (acoustic electric guitar nakasabit sa wall) bigay ng ate ko at dito ako na in love sa gitara, it’s a Takamine (Japanese made). And probably after that, I moved to Martin, this is my favorite guitar, the feel, the sound. Ito ‘yung gusto kong gamitin kapag magpe-perform ako. And then If I’m going to practice, I have a Taylor mini this has an amazing sound. And this is the Pratty guitar, John Prats guitar, he’s gonna kill me for saying that (natawa), it’s a Mini Martin it is the first very came out. And this is my favorite sounding guitar sa lahat-lahat,” sabay tugtog ng aktor.

Sa ilang araw ng ECQ sa buong Metro Manila ay never lumabas ng unit niya si Sam at lahat ng kailangan niya ay online shopping. Hindi rin niya kasama ang forever personal assistant na si Nene dahil nasa bahay niya ito sa Pasig kasama ang kapatid.

Noo’y nabalitang planong ibenta ng aktor ang bahay niya sa Pasig na unang pundar niya simula nang mag-showbiz, pero nabago ang isip dahil mura lang niya nabili noon at ngayon ay mataas na ang value at higit sa lahat, dito tumutuloy ang magulang niya at kapatid kapag uuwi ng Pilipinas. Sa Ohio, USA nakabase ang pamilya ng binata.

At dahil mahilig magsulat ng kanta si Sam ay nakatitiyak kami na nakagawa na siya ng ilang kanta para sa next album niya pagkatapos ng Sam:12 na ini-release noon pang 2017.

 

 

FACT SHEET
ni Reggee Bonoan