HATAW! D'yaryo ng Bayan hatawtabloid.com
ANG daming naka-miss kay Kris Aquino dahil umabot sa 68.5k comments, 70k likes, at 756k views base sa datos ng Cornerstone Entertainment ang ginawang FB Live nitong Sabado, 8:30 p.m. hanggang 10:12 p.m..
Pawang positibo ang lahat ng komentong nabasa namin mula sa netizens na matagal na siyang inaabangan at iisa ang sinabi ng lahat, ‘you look good.’
Kasi naman nakapagpahinga nang husto at malayo sa polusyon si Kris kasama ang mga anak na sina Joshua at Bimby sa loob ng dalawang buwan sa napakatahimik na lugar na Puerto Galera.
Sabi nga ni Kris kay K Brosas, “baka ayaw mo rito sa lugar namin kasi ito ‘yung pinaka-tahimik na lugar and ang linis-linis ng tubig (sa dagat). Sa kabila kasi nandoon ‘yung party-party.
“Mag-two months na pala kami rito sa May 12, I’m so happy, nagustuhan ko na ang buhay probinsiya kasi simple lang.”
Pero umapela ang bunso niyang si Bimby na gustong-gusto nang bumalik ng Maynila.
“Sabi ko nga kay Bimb, may malakas naman ang internet, okay na,” sabi pa.
Hanggang sa na-off-the-air si Kris dahil nawalan ng koryente at generator ang ginamit sa resort.
“Hayan, sabi ni Bimb, nawawalan ng kuryente, gusto ko pa rin ba rito?”
Anyway, noong i-anunsiyo ng Queen of Social Media ang pagbabalik niya ng live sa online ay marami ang natuwa at hinihintay ang pagtatapos ng Enhance Community Quarantine, pero nanggulat si Kris dahil bisperas ng Mother’s Day ay nag-FB Live siya para sorpresahin ang lahat at ang mga nanay sa buong Pilipinas.
Aniya, “I‘ve missed you…BUT na feel ko special occasion ako dapat maki-connect ulit. SUPER SPECIAL ang araw na pinagdiriwang nating lahat ang mga ina, nanay, mommy, mothers and mamas.”
Nakatsikahan ni Kris sa kanyang FB Live ang kapwa niya Cornerstone talents na sina Empoy Marquez, Jaya, at K Brosas.
FACT SHEET
ni Reggee Bonoan
