HATAW! D'yaryo ng Bayan hatawtabloid.com
NAKADAGDAG sa problema ng stuntman na si Reynaldo Cristobal o Rey Solo ang pagsasara ng ABS-CBN dahil sa cease and desist order ng National Telecommunication Commission (NTC) na ibig sabihin ay hindi na siya makababalik sa trabaho niya sa FPJ’s Ang Probinsyano ni Coco Martin.
Problemado na nga na nangyari ang ECQ dahil nahinto ang tapings/shootings nila dahil ito lang ang pinagkakakitaan ni Manong Rey na bumubuhay sa asawang maysakit na na-stroke ngayon.
Hindi malaman ni Manong Rey kung paano niya tutustusan ang gamot ng asawa lalo’t hindi rin siya makalabas ng bahay dahil sa ipinatutupad ng Maynila na bawal lumabas ang mga senior citizen.
Nakatanggap naman silang mag-asawa ng relief goods pero hindi ito sapat dahil ang importante ay pambili ng gamot o gamot na maihahatid sa bahay nila kasi nga hindi siya makalabas.
Kilala sa showbiz si Manong Rey dahil abot 40 taon na siya sa industriya at nagsimula siyang magtrabaho sa ABS-CBN sa Bida si Mister, Bida sa Misis (2002) nina Maricel Soriano at Cesar Montano.
“Napakahirap po nang ‘di lumalabas ng bahay lalo na kung nasanay ka noon na araw-araw nasa taping, nasa shooting, pagkatpos ngayon naandito ka lang ‘di ka makalabas ng bahay, eh dadalawa lang kami ng misis ko rito, anak ko naman nasa kabilang bahay. Mahirap para sa amin na senior citizen,” saad nito.
Hindi lang silang mag-asawa ang iniisip ni Manong Rey kundi ang kapwa niya stuntman na nawalan din ng trabaho kaya sana mabigyan sila ng tulong ng gobyerno.
“Sa ngayon hindi ko po masabi ‘yung ibang mga kasama ko kung ano ang mga nangyayari sa kanila, tulad ko na walang trabaho. Sana madinig din ng gobyerno na tulungan ang mga stuntman at mga manlalabas sa pelikula na wala nang ginagawa,” sabi pa.
Nabanggit din na sana makarating kay Coco ang hinaing niya at kapwa niya stuntmen na matulungan sila sa panahon ng pandemic. Matagal na silang hindi nagkita ni Cardo.
“Hindi na po kami nagkita simula noong cast party ng ‘Probinsiyano.’ ‘Direk coco, kapag kailangan mo sa mga susunod pang araw, sana isama mo ako sa mga project mo,” say pa.
At sa mga gustong makatulong o makausap si Manong Rey, ito po ang kanyang contact number +63 927 361 6826 at +63 930 755 3344.
FACT SHEET
ni Reggee Bonoan
