HATAW! D'yaryo ng Bayan hatawtabloid.com
NASA 2,000 ang mga reklamong natanggap ng Department of the Interior and Local Government (DILG) laban sa mga opisyal ng barangay hinggil sa pamamahagi ng cash subsidy, sa ilalim ng Special Amelioration Program (SAP).
Ayon kay DILG Undersecretary for Barangay Affairs Martin Diño, pangunahin reklamo ang pagbibigay prayoridad ng barangay officials sa kanilang mga kamag-anak at kaalyado sa politika para mabigyan ng tulong pinansiyal.
“’Yan ang mga reklamo sa atin, ‘yun daw pinipili ni kapitan puro kamag-anak puro kaalyado,” ani Diño sa panayam sa radyo.
Ilan pa aniya sa mga reklamo na natanggap ng DILG ang pag-charge ng P2,000 sa mga beneficiaries bilang processing fee para sa ayuda.
Ang iba naman ay nagrereklamo dahil hindi nabigyan ng SAP dahil bagong lipat sila at hindi kasama sa listahan ng mga benepisaryo, na ibinase sa census na isinagawa noong 2015.
“‘Yung mga bagong salta sa barangay ang hindi agad naabutan ng tulong dahil ang ginamit na listahan ay 2015 pa,” ayon kay Diño.
Kaugnay nito, tiniyak ni Diño na nireresolba na ng ahensiya ang mga isyu, para matiyak na makatatanggap ng subsidiya ang mga kalipikadong benepisaryo.
Una nang ipinag-utos ni Pangulong Rodrigo Duterte ang pamamahagi ng ayuda sa ilalim ng SAP, na P16,000 sa 18,000 low income families sa buong bansa, sa loob ng dalawang buwan, upang tulungan silang makaagapay sa epekto ng pandemyang COVID-19.
Pinaglaanan ito ng budget na P200 bilyon.
Binigyan ng DILG ng deadline ang mga local government units na tapusin ang pamamahagi ng SAP hanggang 30 Abril, ngunit kalaunan ay pinalawig ito ng isang linggo pa o hanggang 7 Mayo. (ALMAR DANGUILAN)
